Sozaq aýdanynda «Jigit sultany-2019» baıqaýy ótti
SOZAQ. QazAqparat – Túrkistan oblysy, Sozaq aýdanynda «Jigit sultany-2019» baıqaýy ótti. Jartytóbe aýyldyq okrýgi ákimdigi jáne Sozaq aýdany ishki saıasat bóliminiń «Jastar resýrstyq ortalyǵy» KMM-niń uıymdastyrýymen ótken shara «Jigitter segiz qyrly, bir syrly bol» ataýymen uıymdastyryldy, dep habarlaıdy QazAqparat tilshisi.
Jastar jylyna oraı jáne Elbasymyzdyń «Rýhanı jańǵyrý» baǵdarlamasy aıasynda uıymdastyrylǵan baıqaýda aýdannyń Sholaqqorǵan, Taýkent, Syzǵan, Qumkent, Babata, Aqqoltyq, Jartytóbe aýylynan kelgen úmitkerler óz baǵyn synady. Qatysýshylar sálemdesý, óz óneri jáne suraq-jaýap saıystarynan ónerlerin kórsetti. Tanystyrý kezeńinde jigitterdiń bilim, biliktiligi, sóz saptaý, sóıleý máneri synaldy. Bul týrda sharshy toptyń aldyna shyǵyp tosylǵandar da boldy, aryny qatty aqyndar da boldy. Óz ónerin kórsetýde ózgelerden erek bolǵandar eldiń qoshemetine bólendi. Jigitter sondaı–aq, kózderin baılap qarý jınaýdan jarysty. Atalǵan saıystardan oqtaı ozyp shyqqan jeńimpazdar baıqaýdyń kelesi kezeńine joldama alyp, alǵys hattarmen jáne syılyqtarmen marapattaldy. Baıqaý jeńimpazdary qatarynan Darhan Abdrahmanov pen Aıdos Sarmanuly, Baýyrjan Amanovtar tabyldy. Ózge qatysýshylar da arnaıy tıisti deńgeıde marapattaldy. Jeńimpazdarmen júldegerlerge aýyl okrýg ákimi Bolat Esenqabyl arnaıy syılyqtar tapsyrdy.
Aınur Aqbaeva
