Sozaq aýdanynda túıe sharýashylyǵyn damytý isi jandanyp keledi
Aýdanda aǵymdaǵy jyldyń ózinde óńirdegi sútti baǵyttaǵy túıe sanyn 1600 basqa arttyrý kózdelip otyr. Búginde aýdan ákimi S.Polatovtyń bastamasymen irili-usaqty túıe baǵatyn qojalyqtardy biriktirý men asyl tuqymdy sútti mol kólemde beretin túıelerdi satyp alý, sút qabyldaý beketterin uıymdastyrý máseleleri qarastyrylýda. Tórt aýyldyq okrýgte sút qabyldaý beketteri ornalastyrylǵan bolsa, sonyń biri «Baǵdat» sharýa qojalyǵynyń qorasynda tur. Atalǵan qojalyqta búginde 505 bas túıe bar bolsa, onyń 276-sy analyq bas sanalady. 4 myń gektar jaıylymy bar qojalyq bıyl saýyndy túıe sanyn 50-ge jetkizip, táýligine 150 lıtr sút óndirsek dep otyr.
«Jýyrda bizge Túrkistan qalasyndaǵy túıe sútin tereń óńdeıtin zaýyttan ókilder arnaıy kelip, 1 tonnalyq sút qabyldaý qondyrǵysyn ornatyp ketti. Onda óziniń salqyndatqyshy, qozǵap turatyn tetigi bar. Zaýyt ókilderi bir lıtr túıe sútin 1000 teńgeden satyp alamyz dep otyr. Endi birer aıda bizde 20-30 túıe saýyla bastasa, aptasyna shamamen 300 lıtr túıe sútin óndire alamyz. Budan bólek, kórshi sharýa qojalyqtarynyń da sútterin qabyldap, shamamen aptasyna 1 tonna sútti zaýytqa ótkize alamyz dep boljap otyrmyz», – deıdi «Baǵdat» sharýa qojalyǵynyń jetekshisi Patıma Nyshanbaeva.
Jalpy, qazirdiń ózinde aýdandaǵy túıe sany 11 myńnan asyp otyr. Endigi mindet-analyq basty túıe sanyn 1600-ge arttyryp, sút kólemin 4 myń tonnaǵa jetkizý.
«Bul jospardy oryndaý úshin óńirde arnaıy baǵdarlama túzilip, Túrkistan qalasyndaǵy «Colden Camal» zaýytymen birlesip jumys isteý isi jandanýda. Osynyń negizinde aýdanda 4 qojalyqtyń qorasyna 1 tonnalyq sút qabyldaý beketteri ornalastyryldy», – deıdi Sozaq aýdandyq aýyl sharýashylyǵy bólimi basshysynyń orynbasary Qanat Ýtanǵazıev.
