Sozaq aýdanynda salynǵan joldardyń sapasy talapqa saı emestigi anyqtaldy
SOZAQ. QazAqparat – QR Sybaılas jemqorlyqqa qarsy is-qımyl agenttigi Túrkistan oblysy boıynsha Departamentiniń janynan qurylǵan «Sapaly jol» jobasy aıasynda Sozaq aýdanynyń avtokólik joldaryna keshendi monıtorıng jumystary júrgizildi. Baqylaý jumystary barysynda jańadan salynǵan joldardyń sapasy syn kótermeıtini anyqtalǵan, dep habarlaıdy QazAqparat tilshisi.
Qoǵamdyq baqylaý jumystaryna Sozaq aýdany ákimdigi men sybaılas jemqorlyqqa qarsy is-qımyl departamenti basshylyǵy, aýdandyq arnaıy monıtorıngtik top músheleri men oblystyq «Ulttyq jol aktıvteri sapasy ortalyǵynyń» RMK mamandary, sondaı-aq, jaýapty merdiger kompanııanyń basshylyǵy tartylǵan.
Top músheleri atalǵan aýdanǵa qarasty Tasty jáne Sholaqqorǵan aýyldaryna tóselgen jańa joldardyń quramy men standartyn saralap, jyljymaly jol zerthanalyq kóligi arqyly asfalt beton jamylǵysynan synamalar alynǵan. Tasty aýylynyń turǵyndarynyń aryz-shaǵymdary negizinde júrgizilgen monıtorıngtik jumystar barysynda Baýyrjan jáne Jambyl kósheleriniń asfalt beton jamylǵysynyń betki jaǵynyń buzylý derekteri men onyń qalyńdyǵy smetalyq qujatqa sáıkes kelmeıtindigi anyqtalǵan.
Sondaı-aq, Sholaqqorǵan aýylynda ornalasqan Jambyl, №30, №32 jáne A.Muqanov kóshelerine júrgizilgen arnaıy baqylaý jumystary kezinde de birqatar kemshilikter tirkelgen. Kóshe qıylystarynyń biriktirilgen tustarynyń shashylý derekteri men jol tóseliminiń qalyńdyǵy birkelki emestigi belgili bolǵan.
Sala mamandary merdiger jumysynda anyqtalǵan kemshilikter boıynsha akt túzip, qaıta jóndeýden ótkizýge qatysty birqatar usynystar berdi.
