Sozaq aýdanynda kúnnen qýat alatyn elektr stansasy salynady
SOZAQ. QazAqparat -Túrkistan oblysy Sozaq aýdanynda kúnnen elektr energııasyn óndiretin stansa salyna bastady. Qýaty 50 MVt bolatyn stansa qurylysyn «ıÝKSES 50» JShS qolǵa alyp otyr, dep habarlaıdy QazAqparat tilshisi.
Elektr stansasyn salý rásimine aýdan ákimi Salyhan Polatov pen «Kazakh Invest» Ulttyq kompanııasy AQ aımaqtyq dırektory Daýletqoja Mamyrov, «Risen Energy» kompanııasynyń bas menedjeri Champıon ıÝan qatysty. 60 mıllıon dollardy quraıtyn jobaǵa Qytaıdyń «Risen Energy» kompanııasy ınvestıtsııa salyp otyr. 
Jobaǵa memleket tarapynan qoldaý kórsetilip, qurylysqa qajetti 125 gektar jer telimi berildi. Stansaǵa osy zamanǵy ozyq úlgidegi qural-jabdyqtary qoıylady dep josparlanǵan. Nysan keler jyldyń basynda paıdalanýǵa berilmek. Joba tolyq qýatynda jumys isteı bastaǵan kezde turaqty 30 jumys orny ashylady dep kútilýde.
«Búginde qaýipsiz energııa kózderin damytý - elimiz úshin mańyzdy mindetterdiń biri. Ol úshin Úkimet tarapynan barlyq múmkindikter jasalýda. Osy oraıda Sozaq aýdanynda energetıkalyq keshendi damytý úshin úlken jobany iske asyrǵaly otyrmyz. Atalǵan istiń qurylys jumystaryn júrgizýge 100-ge tarta adam tartylady»- dedi aýdan ákimi Salyhan Polatov.
