Sozaq aýdanynda iz-túzsiz ketken 13 jasar qyz Shymkentten tabyldy
SOZAQ. QazAqparat - Túrkistan oblysynyń Sozaq aýdanynda úıinen shyǵyp ketip, iz-tússiz joǵalǵan 13 jasar qyz Shymkent qalasynan tabyldy. Bul jóninde oblystyq polıtsııa departamentine silteme jasap QazAqparat habarlaıdy.
10 jeltoqsan kúni túngi saǵat 03:00 shamasynda Sozaq aýdanynyń polıtsııa bólimine jergilikti áıel aryzdanyp, 13 jasar qyzynyń 9 jeltoqsan kúni keshki ýaqyttan beri tabylmaı jatqanyn habarlaǵan. Alǵashqyda qyzdy ózderi izdegen ata-anasy nátıje shyqpaǵan soń polıtsııa bólimine kelip aryzdanǵan.
Atalǵan jaıtty birden tirkeýge alǵan polıtsııa qyzmetkerleri 7-synyp oqýshysyn tabý úshin ýchaskelik polıtseılerden quralǵan arnaıy kúshti jumyldyrdy. Polıtseıler taksı júrgizýshilerinen, aýdan ortalyǵyndaǵy saýdagerlerden, kórip-bilýi múmkin degen adamdardan surastyryp shyqty. Olar sonymen qatar joǵalǵan qyzdyń áleýmettik jelidegi paraqshalaryna arnaıy mamandar arqyly shyǵyp, qyzdyń júrgen jerin topshylaıdy.
«Osyndaı jedel sharalar atqarylyp jatqanda qyzdyń ata-anasy da qaıta-qaıta polıtsııa bólimine kelip, polıtseılerdiń «izdep jatyrmyz» degen sózine qanaǵattanbaı, biraz shý shyǵarady. Biraq qandaı jaǵdaı oryn alsa da, óz isine muqııat kirisken polıtseıler izdestirý jumysyn jalǵastyra beredi» delingen habarlamada.
Aqyry sol kúni keshki ýaqytta ýchaskelik polıtseıler qyzdyń Shymkent qalasyndaǵy saýda oryndarynyń birinde qydyryp júrgenin anyqtap, sol jerden bólimshege alyp keledi. Qýanyshtan kózine jas alǵan ata-ana qyzdyń din aman tabylǵanyna qýanyp, polıtseılerden keshirim surap, ásirese shydamdylyq tanytyp, qyzdy megapolısten alyp kelip, din aman tabystaǵan ýchaskelik polıtseı, polıtsııa podpolkovnıgi Saken Áshirqulovqa erekshe alǵys aıtty.
Tergeý barysynda belgili bolǵandaı, jasóspirim qyzdyń úıinen ketip qalýyna ata-anasymen arada bolǵan kishigirim kıkiljiń sebep bolǵan.
Sozaq aýdanynyń polıtseıleri barlyq ata-anaǵa balalardy baqylaýda ustaý kerektigin eskertedi. Sonymen qatar jasóspirimderdiń ótpeli kezeńdi bastan keshiretinin eskere otyryp, olardyń pikirimen sanasyp, dos retinde sóılesip turý qajettigin aıtady.
