Sozaq aýdanynda 24 nysan paıdalanýǵa berildi
ShYMKENT. QazAqparat - Túrkistan oblysy, Sozaq aýdanynyń 90 jyldyq mereıtoıyna oraı 24 nysan el ıgiligine tapsyryldy. Olardyń qatarynda sport kesheni men alleıa, sport jáne balalar oıyn alańshasy,balabaqsha bar, dep habarlaıdy QazAqparat tilshisi.
Sozaq aýdanynyń 90 jyldyǵyna arnaıy at basyn burǵan Túrkistan oblysynyń ákimi Janseıit Túımebaev aýdandyq aýrýhana ujymyna medıtsınalyq avtokólikterdiń kiltin tapsyrdy. Sondaı-aq, Sholaqqorǵan aýylynda ornalasqan «Táýelsizdik» saıabaǵyndaǵy Sotsıalıstik Eńbek Erleri men kúıshi-sazgerlerge arnalǵan eskertkish-bıýst alleıasynyń ashylý saltanaty qatysyp, óńir turǵyndaryn aıtýly merekemen quttyqtady.
«Sozaq aýdanynyń qurylǵanyna 90 jyl tolý merekesine oraı túrli áleýmettik nysandar paıdalanýǵa berilip, óńir turǵyndaryna úlken tartý jasalyp jatyr. Sozaq aýdany áleýmettik ekonomıkalyq damýy órkendegen óńir ǵana emes, tarıhı tulǵalardy dúnıege ákelgen jer. Tarıhymyzdy tanyp, memleket damýy jolynda eńbek etken azamattardyń madaqtap, este máńgi qaldyrý bizdiń basty muratymyz», - dedi Janseıit Qanseıituly.
Jańadan ashylǵan nysandardyń qatarynda Qumkent aýylyndaǵy sport kesheni bar. Zamanaýı úlgidegi sport ǵımaratynda kúres, boks, fýtbol jáne voleıbol syndy sport túrlerinen sektsııalar jumys isteıdi. Sondaı-aq, mereıtoı qarsańynda Sholaqqorǵan aýylyndaǵy 50 oryndyq «Aıjan» bóbekjaı balabaqshasy, «Jibek joly» saýda kesheni, Qaraǵur aýylynda «Jastar» saıabaǵy, 2 sport alańy men 1 balalar oıyn alańy ashyldy.
Sonymen qatar, Baldysý, Rań ata, Shaǵa, Aqsúmbe eldi mekenderinde medıtsınalyq pýnktter, Sholaqqorǵan aýylynda alleıa, sport jáne balalar oıyn alańshasy men «Street Workout» sporttyq alańynyń tusaýy kesildi. Sondaı-aq, Taýkent qalasynda sport alańshasynyń, Jartytóbe eldi mekeninde «Astana qalasyna 20 jyl» saıabaǵy, sport alańshasy men balalar oıyn alańy, 75 oryndyq «Asyljan» bóbekjaı babaqshasy paıdalanýǵa berildi. Budan ózge, Sholaqqorǵan, Jýantóbe, Jartytóbe, Syzǵan aýyly men Qyzylkól eldi mekeniniń negizgi kósheleri jaryqtandyryldy.
