Sozaq aýdanyna qorshaǵan ortany saqtaý úshin 1 mlrd tekshe metrge jýyq sý jiberildi
ASTANA. KAZINFORM – Sý resýrstary jáne ırrıgatsııa mınıstrligi Tasótkel sý qoımasynan Shý ózeni arqyly Túrkistan oblysynyń Sozaq aýdanyna ekologııalyq maqsatta sý jiberý jumystaryn júrgizip jatyr. Búgingi tańda Sozaq aýdanyna 950 mln tekshe metr sý jiberildi.
Bul sý jiberý sharalary Sozaq aýdanynyń ekojúıesin qoldaý jáne saqtaý úshin qajet. Sý qum men tuzdy shańnyń kóterilýine jol bermeıdi, sondaı-aq mal sharýashylyǵy úshin jem-shóp qoryn jaqsartýǵa múmkindik beredi.
Buǵan deıin ekologııalyq sý jiberýdiń tıimdiligin arttyrý jáne sý shyǵynyn azaıtý maqsatynda Sý resýrstary jáne ırrıgatsııa mınıstri Nurjan Nurjigitovtiń tapsyrmasymen uzyndyǵy 120 shaqyrym, eni 30-40 metr bolatyn Fýrmanov aınalma kanalyna sońǵy 40 jylda alǵash ret mehanıkalyq tazartý jumystary júrgizilgen bolatyn. Nysandaǵy jumystar byltyr shilde aıynda bastalyp, jeltoqsan aıynyń sońynda aıaqtaldy.
Qylyshbaı, Qumózek, Qarabóget jáne Saryózek eldi mekenderiniń boıymen ótetin bul kanaldyń sý ótkizý qýaty sekýndyna 45-50 tekshe metr. Qazirgi ýaqytta Fýrmanov gıdrotorabynan Shý ózeni arqyly sekýndyna 105 tekshe metr sý jiberilip jatyr. Onyń sekýndyna 38 tekshe metri Fýrmanov aınalma kanaly arqyly Sozaq aýdanyna baǵyttalyp otyr.
— Sozaq aýdanynyń turǵyndary sýdyń kelýin kópten beri armandaǵan bolatyn. Aýdanymyz agrarly aımaq bolǵandyqtan, Shý ózeni arqyly keletin sý biz úshin óte qajet. Sebebi biz mal sharýashylyǵyna mal azyǵyn daıyndaımyz. Sonymen qatar Shý ózeni sýynyń kelýi ekologııalyq turǵydan da tıimdi. Eger sý kelmese, onyń tabanynan tuz ben sor kóterilip, elge zııan keltiredi,
— dedi Sozaq aýdandyq máslıhatynyń tóraǵasy Ordabek Jámıev.
Jergilikti turǵyndardyń ótinishi boıynsha «Qazsýshar» RMK «Sý-metrologııa» fılıalynyń mamandary sý deńgeıin baqylaý úshin kópirlerdiń birine gıdrometrııalyq reıka ornatty. Qazirgi tańda sý aǵyny Sozaq aýdanyndaǵy Tasty eldi mekeninen ótip, qosymsha 12 shaqyrym qashyqty eńsergen.
— Byltyr Sý resýrstary jáne ırrıgatsııa mınıstrligi Fýrmanov aınalma kanalyn tazartý jumystaryn júrgizdi. Sonyń nátıjesinde bizge sý turaqty túrde kelip jatyr. Sý kanaldyń sońyna deıin jyldam ári ysyrapsyz jetip otyr. Qazir ekologııalyq zardaptar azaıyp, tipti keıbireýleri tolyq joıyldy dep aıtýǵa bolady. Halyq atynan sheksiz alǵys aıtamyn, — dedi Sozaq aýdanynyń turǵyny Altaı Sársen.
Aıta ketelik Sý resýrstary mınıstrligi úsh oblystaǵy sý qoımalarynda shaǵyn SES salmaq.
