Sóz mergenderi kóz mergendigimen saıysty
NUR-SULTAN. QazAqparat - Nur-Sultan qalasynyń irgesinde ornalasqan demalys keshenderiniń birinde BAQ ókilderi arasynda sadaq atýdan jarys ótti, dep habarlaıdy QazAqparat tilshisi.
Ulttyq sport qaýymdastyǵynyń uıymdastyrýymen ótken sharanyń basty maqsaty - jurtshylyqqa BAQ ókilderi arqyly ulttyq sport túrin nasıhattaý.
Jarysqa Nur-Sultandaǵy respýblıkalyq telearna, radıo jáne ár túrli saıtta qyzmet atqaratyn tilshiler, sondaı-aq, merzimdi basylymdarda, áleýmettik jelilerde ulttyq sport taqyrybynda jıi qalam terbeıtin jýrnalıster qatysty.
Áýeli jarys bastalmas buryn uıymdastyrýshy BAQ ókilderine sadaq atýdyń qyr-syryn úıretti. Sebebi, qatysýshylar arasynda sadaqty qolyna birinshi ret ustap turǵandar da boldy. 
Jarysqa qatysýǵa jalpy 18 jýrnalıst ótinish berip, jerebe arqyly qatysýshylar toptarǵa bólinip, ózara saıysqa tústi. Nysanaǵa tıgizý boıynsha eń joǵarǵy upaı jınaǵan qatysýshy olımıpadalyq júıe boıynsha kelesi aınalymǵa ótip otyrdy.
Asa tartysty ótken básekede «Habar 24» arnasynyń tilshisi Talǵat Ábdiqojaev bas júldeni jeńip alsa, «baq.kz tilshisi Erjan Jaýbaı ekinshi orynǵa ıe boldy. Úzdik úshtikti «Habar» arnasynyń tilshisi Sáken Seıthan túıindedi
Shara sońynda uıymdastyrýshylar qatysýshylarǵa dastarhan jaıyp, naýryz kóje berdi.
