«Soıýz TMA-20» ǵarysh kemesi tasymaldanǵan poıyz qozǵalys kezinde qatelikter jibergen joq - «Lokomotıv» AQ prezıdenti
ASTANA. Qazannyń 8-i. QazAqparat /Gúlmıra Álıakparova/ - «Soıýz TMA-20» reseılik ǵarysh kemesin tasymaldaǵan poıyzdyń jyldamdyqty ólsheý lentalaryndaǵy derekterdi teksergennen keıin, temirjol kóligin júrgizý men tejegishterdi basqarý kezinde eshqandaı qatelikter bolmaǵany anyqtaldy. Bul týraly «Lokomotıv» AQ-nyń prezıdenti Qadyl Talaspekov málim etti.
«Atalmysh poıyz úshin lokomotıvter men lokomotıv brıgadalary arnaıy júkterdi tasymaldaýǵa arnalǵan erejelerge sáıkes jasaqtaldy. Brıgadalar mundaı poıyzdardy basqarýda tájirıbeleri bar І jáne ІІ dárejeli mashınısterden quralǵan. Jáne olardyń tizimi belgilengen tártip boıynsha bekitildi», - deıdi Q.Talaspekov.
Onyń aıtýynsha, poıyz sońǵy núktege jetkenge deıin tejegishterdi shuǵyl túrde qoldanǵan joq. Arnaıy poıyz shekarada qabyldanyp, reseılik temirjolshylarǵa tapsyrylǵanǵa deıin, lokomotıv brıgadasyna qaraýyl bastyǵy men poıyzǵa ilesip júrýshiler tarapynan eshqandaı shaǵym aıtylmaǵan. Poıyz reseılik áriptesterge eshbir eskertýlersiz tapsyryldy.
Eske salaıyq, qazannyń 6-sy kúni keıbir buqaralyq aqparat quraldary «Soıýz TMA-20» ǵarysh kemesin tasymaldaý konteıneriniń zaqymdanýy, onyń Qazaqstan aýmaǵymen tasymaldanýy barysynda oryn alýy múmkin degen aqparat taratqan bolatyn.
