«Soıýz TMA-17» kemesi Halyqaralyq ǵarysh stansasymen túıisti
ASTANA. Jeltoqsannyń 23-i. QazAqparat - Quramyna reseılik ǵaryshker Oleg Kotov, amerıkandyq astronavt Tımotı Krımer men japondyq ǵaryshker Soıtı Nogýtı kirgen jańa ekıpaj mingen «Soıýz TMA-17» kemesi avtomattyq rejımde Halyqaralyq ǵarysh stansasymen túıisti, dep habarlady Ushý saparlaryn basqarý ortalyǵynan.
Jańa ekıpaj aǵymdaǵy jyldyń qazan aıynan beri stansada jumys istep jatqan reseılik Maksım Sýraev pen amerıkandyq Djeffrı Ýılıamsqa qosylady.
Stansaǵa jańadan kelgenderdi úlken jumys kútip tur. Atap aıtqanda, olar úsh amerıkandyq shattldy qabyldaýlary kerek (olardan keıin AQSh shattldardy paıdalanýdy toqtatyp, Halyqaralyq ǵarysh stansasy amerıkandyq segmentiniń qurylysyn aıaqtaýdy josparlap otyr). Sondaı-aq, reseılik eki «Progress» júk kemesin qabyldaýlary, halyqaralyq ǵarysh stansasynyń reseılik segmentine shaǵyn zertteý modýlin (MIM-1) túıistirip, ony jumysqa daıyndaýlary, ashyq ǵaryshta da birneshe mindet atqarýlary kerek.
