«Soıýz MS-28» halyqaralyq ekıpajy Qazaqstanǵa sátti qondy
ASTANA. KAZINFORM — «Roskosmostyń» eki ǵaryshkeri men NASA astronavty Halyqaralyq ǵarysh stantsııasyndaǵy 241 kúndik ekspedıtsııasyn aıaqtap, Qazaqstan aýmaǵyna sátti oraldy.
«Soıýz MS-28» ǵarysh kemesi Astana ýaqytymen saǵat 12:03-te HǴS-tyń «Rassvet» modýlinen ajyrady. Saǵat 14:32-de tejeý qozǵaltqyshy iske qosylyp, keme orbıtadan shyǵyp, Jer atmosferasynyń joǵarǵy qabattaryna baǵyt aldy.
Atmosferaǵa kirer aldynda keme úsh bólikke bólindi. Orbıtalyq jáne aspaptyq-agregattyq bólimder atmosferada janyp ketti. Ekıpaj tek qonýǵa arnalǵan kapsýlada – túsetin apparatta saparyn jalǵastyrdy.
Aldymen atmosferanyń kedergi kúshi kapsýlanyń jyldamdyǵyn tómendetti, al jylýdan ony arnaıy qorǵanys qalqany saqtady. Keıin negizgi parashıýt ashylyp, jerge janasar sátte jumsaq qoný qozǵaltqyshtary iske qosyldy.
Túsetin apparat Astana ýaqytymen saǵat 15:27-de Jezqazǵan qalasynan ońtústik-shyǵysqa qaraı 147 shaqyrym jerdegi qazaq dalasyna qondy. Qoný qalypty rejımde ótti. Ekıpaj músheleriniń jaǵdaıy jaqsy, olardy izdestirý-qutqarý qyzmetiniń mamandary qarsy aldy.
Jerge keme komandıri Sergeı Kýd-Sverchkov, ǵaryshker Sergeı Mıkaev jáne NASA astronavty Krıstofer Ýılıams oraldy. Bul Mıkaev pen Ýılıams úshin alǵashqy ǵarysh sapary bolsa, Kýd-Sverchkov úshin ekinshi mıssııa boldy. Aıta keterligi, ekıpaj komandıri qazirgi Baıqońyr qalasy sanalatyn burynǵy Lenınsk qalasynda dúnıege kelgen.
Ekspedıtsııa 2025 jylǵy 27 qarashada Baıqońyr ǵarysh aılaǵynan bastaldy. Osy ýaqyt ishinde ekıpaj Jerdi 3 856 ret aınalyp ótip, 164 mıllıon shaqyrymnan astam qashyqtyqty eńserdi.
Mıssııa barysynda Sergeı Kýd-Sverchkov pen Sergeı Mıkaev alty saǵattan astam ýaqyt ashyq ǵaryshta jumys istep, «Zvezda» modýline ǵylymı jabdyq ornatty. Al Krıstofer Ýılıams eki ret ashyq ǵaryshqa shyǵyp, HǴS-ty jańa kún batareıalaryn ornatýǵa daıyndaýǵa jáne robottandyrylǵan manıpýlıatordy jóndeýge qatysty.
Jerge oralmas buryn Sergeı Kýd-Sverchkov HǴS-tyń Reseı segmentine basshylyqty Petr Dýbrovqa tapsyrdy. Dýbrov stantsııaǵa 14 shildede Anna Kıkına jáne Anıl Menonmen birge «Soıýz MS-29» kemesi arqyly kelgen bolatyn.
Alǵashqy medıtsınalyq tekserýden keıin ekıpaj tikushaqpen Qaraǵandyǵa jetkiziledi. Keıin Krıstofer Ýılıams AQSh-taǵy Hıýston qalasyndaǵy Djonson ǵarysh ortalyǵyna, al Sergeı Kýd-Sverchkov pen Sergeı Mıkaev Reseıdegi Juldyzdy qalashyqqa attanady.
