«Soıýz MS-11» ǵarysh kemesiniń ekıpajy Qazaqstanǵa sátti qondy

NUR-SULTAN. QazAqparat - Bortynda reseılik ǵaryshker Oleg Kononenko, kanadalyq Davıd Sen-Jak jáne amerıkalyq ǵaryshker Enn Makkleın bar jerge qonýshy apparat 2019 jyldyń 25 maýsymy kúni Nur-Sultan qalasynyń ýaqytymen 08 saǵat 47 mınýtta jerge sátti jetti, dep habarlaıdy «QazAqparat» HAA tilshisi.

Roskosmostyń baspasóz qyzmetinen málim etkendeı, orbıtadan túsý jáne jerge qoný boıynsha barlyq operatsııalar shtattyq rejimde ótti. Ekıpajdyń jaǵdaıy jaqsy. Qazaqstan ǵaryshkerlerdi qarsy alýǵa daıyndalyp jatqany buǵan deıin habarlanǵan bolatyn.

Qoný kezeńi tikeleı efır arqyly kórsetildi. Ǵarysh apparaty ashylǵannan keıin kosmonavtar kapsýladan shyǵarylyp, jerdiń aýyrlyq kúshine daǵdylaný úshin arnaıy kreslolarǵa otyrǵyzyldy. Odan keıin ǵarysh kıimderin sheshý úshin medıtsınalyq shatyrǵa jetkizildi.

Ekıpaj tikushaqtarmen Qaraǵandyǵa jetti. Ol jerden Kononenko Máskeý janyndaǵy ǵaryshkerler daıyndaıtyn ortalyqtyń ushaǵymen Chkalovskıı áýejaıyna attanady. Al Sen-Jak pen Makkleın NASA ushaǵymen ushýdan keıingi ońaltýdan ótý úshin Amerıkanyń Hıýston qalasyna ushpaqshy.

Kononenko-Sen-Jak-Makkleın ekıpajy Halyqaralyq ǵarysh stansasynda 2018 jyldyń 3 jeltoqsanynan bastap jumys istedi. Olar HǴS-ta bolý kezinde Crew Dragon ushqyshsyz kemesin, «Progress MS-11», Cygnus jáne Dragon júk kemelerin qabyldady.

Ashyq ǵaryshqa bes ret ushý oryndaldy: ekeýi reseılik baǵdarlama boıynsha, úsheýi - amerıkalyq. HǴS-ta kelesi ǵaryshtyq aýysymdy reseılik Alekseı Ovchının men amerıkalyq Nık Heıg jáne Krıstına Kýk jalǵastyrmaqshy.

Avtory: Sara Kabıkyzy