«Soıýz MS-09» kemesiniń Qazaqstan aýmaǵyna qonýy translıatsııalanyp jatyr

ASTANA. QazAqparat - Búgin bortynda ekıpajy bar «Soıýz MS-09» basqarylatyn kólik kemesiniń (BKK) Jerge qoný sáti kútilýde, dep habarlaıdy QazAqparat tilshisi.

Roskosmos baspasóz qyzmetiniń málimetinshe, 2018 jyldyń 20 jeltoqsanynda jergilikti ýaqyt boıynsha saǵat 04:40-ta keme Halyqaralyq ǵarysh stansasynan ajyratylǵan.

Keme bortynda  reseılik ǵaryshker Sergeı Prokopev, eýropalyq astronavt Aleksander Gerst (ESA) pen amerıkalyq astronavt Serena Aýnon-Chensellor (NASA) bar.

Ushýdy basqarý ortalyǵynyń (UBO) ballıstıkalyq-navıgatsııalyq qyzmetiniń esebi boıynsha, «Soıýz MS-09» kemesiniń túsirilip otyrǵan apparaty Qazaqstan aýmaǵyna Astana ýaqytymen saǵat 11:03-te, Jezqazǵan qalasynan ońtústik-shyǵysqa qaraı 147 shaqyrym jerde qonady.

«Soıýz MS-09» KBK ekıpajynyń Jerge oralýynyń translıatsııasy ol qonǵanǵa deıin bir saǵat buryn bastalyp, qazirgi ýaqytta Roskosmostyń áleýmettik jelilerinde kórsetilip jatyr. 

 «Soıýz MS-09» ǵarysh kemesi Halyqaralyq ǵarysh stansysymen 2018 jylǵy 8 maýsym kúni túıisken. HǴS-ta bolǵan kezde ekıpaj aýqymdy zertteýler baǵdarlamasyn atqarǵan, atap aıtqanda, ashyq ǵaryshqa shyǵý, júk kemelerimen jumys isteý, HǴS bort júıelerine qyzmet kórsetý sııaqty mıssııalardy oryndady. Sergeı Prokopev HǴS reseılik segmentiniń ushý baǵdarlamasy boıynsha ashyq ǵarysh keńistigine eki ret shyqqan.

Avtor: Sara Qabıqyzy