«Soıýz-5/Suńqar»-dyń ushyrylýy Qazaqstan men Reseıge qandaı múmkindikter ashady
ASTANA. KAZINFORM – Baıqońyrdan alǵash ret «Soıýz-5/Suńqar» zymyran-tasyǵyshy ushyryldy. Ol Reseı men Qazaqstannyń birlesken Baıterek jobasy aıasynda júzege asty. Onyń artyqshylyqtary men eki eldiń ǵarysh salasyndaǵy perspektıvalary týraly «MIR 24» jazdy.
Bir aı buryn orta klasty «Soıýz-5/Suńqar» zymyran-tasyǵyshy qurastyrý-synaq korpýsynan shyǵarylǵan. Osy ýaqyt aralyǵynda «Baıterek» starttyq kesheninde keshendi synaqtar júrgizildi.
Zymyran-tasyǵysh júk jetkizýge jáne avtomatty apparattardy orbıtaǵa shyǵarýǵa arnalǵan. Ol Jer mańyndaǵy orbıtalarǵa 17 tonnaǵa deıin, al geostatsıonarlyq orbıtalarǵa 2,5 tonnaǵa deıin júk shyǵara alady.
Bul – memleketaralyq joba. Zymyran prezıdenttiń tapsyrmasy boıynsha, úkimettiń jetekshiligimen jasaldy. Sátti ushyryldy. «Baıterek» jobasy boıynsha qazaqstandyq áriptesterimiz de ǵarysh derjavalary klýbyna qosyldy, olardy quttyqtaımyz. Bul jobany ári qaraı damytyp, zymyran sıpattamalaryn jaqsartyp, orbıtaǵa shyǵarylatyn paıdaly júktiń kólemin arttyramyz, – dedi «Roskosmos» korporatsııasynyń bas dırektory.
«Soıýz-5/Suńqar» zymyran-tasyǵyshy Progress ortalyǵynda ázirlengen. Mamandardyń aıtýynsha, bul – ekologııalyq turǵydan qaýipsiz ǵarysh tehnıkasyna jasalǵan qadam. Zymyran ýly emes otynmen – kerosın men suıyq ottegimen jumys isteıdi.
Alǵashqy ushý ushý-konstrýktorlyq synaqtar aıasynda ótti. Olardy sátti aıaqtaǵannan keıin «Soıýz-5/Suńqar» «Zenıt» zymyran-tasyǵyshtar tobynyń ornyn basady dep josparlanyp otyr.
Qazaqstan úshin «Baıterek» jobasy – strategııalyq mańyzy bar jetistik. Ol elge óziniń ǵaryshtyq ushyrý ınfraqurylymyn derbes paıdalanýǵa múmkindik beredi.
Aıta keteıik, buǵan deıin Baıqońyrdan alǵash ret «Soıýz-5/Suńqar» zymyran-tasyǵyshy ushyrylǵanyn habarladyq.
Sondaı-aq Baıqońyrdan ushyrylǵan «Soıýz-5/Suńqar» zymyran-tasyǵyshy qalaı jabdyqtalǵanyn da jazdyq.
