«Soıýz-2» zymyrany Baıqońyrdan soltústik traektorııamen ushyrylady

BAIQOŃYR. QazAqparat - Mysyrdyń Egyptsat-A spýtnıgin orbıtaǵa alyp shyǵatyn «Soıýz-2» tasymaldaýshy zymyranynyń Baıqońyr ǵarysh aılaǵynan ushýyna bir táýlikteı ýaqyt qaldy, dep habarlaıdy QazAqparat tilshisi.

Osymen Baıqońyr ǵarysh aılaǵynyń 2019 jylǵy baǵdarlamasyna start beriletinin habarlaǵan edik. 18 aqpan kúni «Fregat» blogy jáne Egyptsat-A ǵarysh apparaty ornatylǵan «Soıýz-2» zymyrany Baıqońyr ǵarysh aılaǵynyń start keshenine turǵyzylǵan.

Roskosmos baspasóz qyzmetiniń málimdeýinshe, Baıqońyrdan aspanǵa kóterilgen tasymaldaýshy zymyrannyń traektorııasy soltústik baǵytta: Qazaqstannyń Aqtóbe jáne Qostanaı oblystarynyń, sondaı-aq Reseıdiń Oral óńiriniń ústinen ótedi.

Mysyrdyń Jerdi qashyqtyqtan zondtaıtyn spýtnıgin «Soıýz-2» zymyranymen ushyrý 2019 jylǵy 21 aqpan, beısenbi, Astana ýaqytymen 22 saǵat 47 mınýtqa josparlanǵan.

Egyptsat-A ǵarysh apparaty Jer betin joǵary tunyqtyqpen beınege túsirý maqsatynda jasaldy. Ony Mysyr Arab Respýblıkasynyń Úkimeti paıdalanady. Ushý synaqtarynyń baǵdarlamasy aıaqtalǵan soń, spýtnık Mysyrdyń basqarýyna beriledi.

Avtor: Sara Qabıqyzy