Soılybaevtyń qarsylasy meksıkalyq Vargas týraly ne bilemiz
ASTANA. QazAqparat - Birde-bir márte jeńilip kórmegen qazaqstandyq Bekman Soılybaev 19 qazan kúni kásipqoı bokstaǵy óziniń 12-shi kezdesýin ótkizedi. Qazaqstandyq boksshynyń qorjynyndaǵy ekinshi orta salmaqtaǵy WBC International tıtýlyna bul joly meksıkalyq Fernando Vargas kóz tigip otyr. Osy rette «QazAqparat» HAA tilshisi qazaqstandyq boksshynyń qarsylasy týraly aqparatty usynady.
Diamond Ring portaly usynǵan málimetke sáıkes, meksıkalyq bylǵary qolǵap sheberiniń jasy 29-da. Tolyq esimi - Fernando Vargas-Parra, laqap aty - El Ferrozıto. 2006 jyldyń qyrkúıeginde tuńǵysh ret kásipqoı bokstyń sharshy alańyna shyqqan ol Meksıkadaǵy eń myqty elý boksshynyń reıtinginde 13-shi orynda tur. Jas bolǵanyna qaramastan, buǵan deıin 47 márte kezdesý ótkizip úlgergen. Onyń 32-sinde jeńiske jetip (21-in nokaýtpen), 12-de qarsylastaryna ese jiberipti. Teń túsken aıqastarynyń sany - 3.
Kásibı boksta 11 jyldyq tájirıbesi bar Fernando Vargas eń alǵashqy kezdesýin Omar Rohaspen ótkizgen. Birinshi kezdesýi meksıkalyqtyń paıdasyna sheshilip, qarsylasyn tehnıkalyq nokaýtpen utqan. Budan keıingi Vargastyń 9 kezdesýi de sátti aıaqtalyp, dodanyń bárin de ýaqytynan buryn aıaqtapty. Al bıylǵy jyly Vargas úsh ret sharshy alańǵa shyqqan. Onyń ekeýinde mereıi ústem bolǵanymen, Las-Vegasta ótkizgen sońǵy aıqasynda tóreshilerdiń sheshimi boıynsha jerlesi Horatsıo Garsııaǵa ese jibergen. Álem kóz tikken boks keshterinen meksıkalyq qalmaýǵa tyrysatyn kórinedi. Boksshy tipti birneshe márte akter ári prodıýser retinde teleserıalǵa túsip úlgeripti.
Boks álemindegi sarapshylar Vargasty chempıondyq tıtýl úshin baǵyn synaýǵa laıyqty boksshy dep biledi. Áý bastan meksıkalyq boksshynyń jumysyn tanymal menedjer Djeıms Patrık Braýn júrgizedi.
Eske sala ketsek, meksıkalyq Fernando Vargas pen Bekman Soılybaev 19 qazan kúni Las-Vegastaǵy boks keshinde qolǵap túıistirmek. Dál sol kúni Golovkınniń burynǵy qarsylasy Gabrıel Rosado (23-11, 13 KOs) men Glena Tapıa (23-4, 15 KOs) sharshy alańǵa shyǵady. Dodanyń barlyǵyn tanymal sporttyq telekanal Golden Boy Boxing tikeleı efırde kórsetetin bolady.
