Soyle.kz qyzmetterin 1,5 mıllıonnan astam adam paıdalandy
ASTANA. QazAqparat - Soyle.kz múmkindikterin 1,5 mıllıonnan astam adam paıdalandy. Bul týraly Ortalyq kommýnıkatsııalar qyzmetindegi baspasóz máslıhatynda QR Tuńǵysh Prezıdenti - Elbasy Qory atqarýshy dırektorynyń orynbasary Sultan Aıtjanov málim etti, dep habarlaıdy QazAqparat.
«Soyle.kz - 2013 jyldyń jeltoqsanynda ashylǵan qazaq tilin tegin úıretetin tuńǵysh onlaın portal. Ashylǵaly beri Qazaqstan men shetelderden 1,5 mıllıonnan astam adam portal qyzmetin paıdalansa, tirkelip oqyp jatqandardyń sany 50 myńnan asty. «Soyle.kz» portalynyń áleýmettik jelileri arqyly 20 myńnan astam adam qazaq tilin úırenip jatyr. Android jáne IOS platformalaryndaǵy «Soyle» qosymshasyn 30 myńnan astam adam júktep alsa, «bala.soyle.kz» balalar saıtyn kúndelikti 1,5 myńnan astam jas jetkinshekter paıdalanýda»,-dedi Aıtjanov.
Budan buryn habarlanǵandaı, Ortalyq kommýnıkatsııalar qyzmetinde Memlekettik tildi damytý qory «Soyle.kz» portalynyń IOS platformasyndaǵy mobıldik qosymshasy men patrıottyq taqyryptarǵa arnalǵan basqa da qosymshalardyń tusaýkeserin ótkizdi.
