Sovetqazy Nursıla lıngvıstıkalyq komıssııasynyń synynan ótti-OSK
ASTANA. 17 aqpan. QazAqparat /Aıdar Ospanalıev/ - Memleket basshysy laýazymynan úmitker retinde OSK-ǵa ótinish bergen Sovetqazy Nursıla Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııanyń synynan ótti.
Lıngvıstıkalyq komıssııa otyrysynan soń S.Nursılanyń emtıhan nátıjelerin jarııa etken lıngvıstıkalyq komıssııa tóraǵasy Myrzataı Joldasbekov: «S.Nursıla «Atameken» degen taqyrypta jazba jumysyn jazdy. Taqyrypty ashý jaǵynan azdap kemshin túskenimen sóılem qurap, jaza alatyny kórinip tur. Ekinshi kezeń boıynsha úmitker M.Áýezovtyń «Abaı joly» romanynan úzindi oqydy. Mátindi ol ortasha oqydy dese de bolady. Sebebi keıbir áripterdi jutyp qoıady. Úshinshi kezeńde úmitker "Memlekettik til biriktirýshi kúsh" degen taqyrypqa sóıledi. Bul kezeńde bizdiń úmitker memlekettik tilimizdiń kúshi men qudireti jóninde aıtýdan góri, til máselesi, tildiń mártebesi, aýdarma sııaqty máseleler jóninde kóp aıtty. Bul rette úmitker taqyrypty túbegeıli ashty dep aıta almaımyz. Degenmen onyń qazaqy ortada ósip, qazaqsha oılaıtyndyǵy kórinip tur. Osynyń barlyǵyn saraptaı kelgende komıssııa músheleri S.Nursıla memlekettik tildi meńgergen degen qorytyndy shyǵardy»,-dedi M.Joldasbekov.
Osylaısha Ortalyq saılaý komıssııasyna saılaýǵa qatysý úshin ótinish bildirgen 15 azamattyń 6-ýy Prezıdenttike kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııanyń synynan ótti. Olar zańger Sálim Óten, ekolog- ǵalym Musaǵalı Dýambekov, Memleket basshysy Nursultan Nazarbaev. «Nur Islam» týrıstik fırmasynyń dırektory Qanat Týrageldıev jáne Pavlodar oblysynyń 55 jastaǵy turǵyny Sovetqazy Nursıla. Atalǵan azamattardyń arasynda Qanat Týrageldıev pen Sovetqazy Nursıladan ózge azamattar osy ýaqytta qol jınaý jumystarymen aınalysýda.
Al «Kenesary han» qoǵamdyq qorynyń prezıdenti, Ýálıhan Qaısarov pen ýaqytsha jumyssyz Qanat Esjanov Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııanyń synynan óte almady. Osy sebepti Ortalyq saılaý komıssııasy atalmysh úmitkerlerdi tirkeýden bas tartyp, tıisti qaýly qabyldady. Sondaı-aq Prezıdent saılaýyna qatysatyndyǵyn bildirip OSK-ǵa ótinish bergen zeınetker Záýre Masına ótinishin qaıtaryp aldy.
Ózge úmitkerler, naqtyraq aıtqanda, «Bastıon- Ast» kúzet agenttigi» JShS-de kúzetshi bolyp isteıtin 48 jastaǵy Tolybaı Baımýrzın, «Attan, Qazaqstan» qozǵalysynyń jetekshisi Amantaı qajy Asylbek, 1954 jyly týylǵan jambyldyq Gúldana Toqbaeva, 1957 jyly týylǵan almatylyq Maıa Qaramaeva, 1968 jyly týylǵan Astana qalasynyń turǵyny Adalbek Qunanbaev jáne «Tabıǵat» ekologııalyq odaǵynyń tóraǵasy Mels Eleýsizov memlekettik til jóninen emtıhandy aldaǵy ýaqytta tapsyrady.
Osy oraıda «Attan, Qazaqstan» qozǵalysynyń jetekshisi Amantaı qajy Asylbektiń memlekettik tilden alynatyn synaqqa eki márte kelmeı qalǵandyǵyn aıta ketý kerek. Ázirge onyń til jóninen emtıhandy qashan tapsyratyny belgisiz.
