Sovetqazy Nursıla kezekten tys Prezıdenttik saılaýǵa túsý jónindegi ótinishin qaıtaryp alatyndyǵyn málimdedi
ASTANA. 17 aqpan. QazAqparat /Aıdar Ospanalıev/ - Búgin Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııanyń synynan ótken úmitker Sovetqazy Nursıla kezekten tys Prezıdenttik saılaýǵa túsý jónindegi ótinishin qaıtaryp alatynny málimdedi.
Bul týraly ol búgin emtıhannan soń jýrnalıstermen bolǵan kezdesýinde aıtty.
«Men bul saılaýǵa túspeıtin boldym. Men azamattar men Konstıtýtsııa qundylyqtary, demokratııa qundylyqtary eshqashanda aıaqasty etilmeıtindigin dáleldedim. Men Qazaqstannyń qatardaǵy azamatymyn jáne ózimniń kandıdatýramdy alyp tastaǵaly otyrmyn. Men ózimniń aldyǵa qoıǵan maqsatymdy oryndadym. Meniń qujattarym qabyldandy, emtıhannan óttim. Men munda kelgende "qujattarymdy qabyldar ma eken, sodan soń emtıhannan ótkizer me eken?" degen oımen kelgenmin. Ortalyq saılaý komıssııasy qujattarymdy qabyldady, emtıhannan da óttim. Ár azamattyń óziniń konstıtýtsııalyq quqyqtary bar, men osyny dáleldegim keldi»,-dedi ol.
S.Nursılanyń sózine qaraǵanda, ol saılaýshylardyń 1 paıyz daýsyn da jınaı almaıdy. «Eger men ári qaraı saılaý dodasyna túse beretin bolsam, árbir kandıdatqa bólinetin qarjyny bostan-bos shyǵyn etken bolyp shyǵamyn. Al ol qarjy salyq tóleýshilerdiń qarjysy emes pe?»,-dedi ol.
