Sotyna sengen el keleshegine de senimdi - Jaqyp Asanov
«Meniń oıymsha, biz ózimizdiń problemalarymyzdy, kemshilikterimizdi qoǵamǵa jasyrmaı jetkize bilsek, túsindire bilsek qoǵam qyzmetimizdiń qyr-syryn odan saıyn jaqsy biletin bolady. Al endi qoǵam, jurt bizdiń jumysymyzdyń qyr-syryn bilgen saıyn bizge degen, sýdıalarǵa degen talap odan ary óse túsedi. Bul túbi neni beredi? Óıtkeni qoǵam bilgennen keıin bizdiń ár sózimiz, ár qadamymyz jurttyń baqylaýynda. Al olardyń baqylaýynda bolǵannan keıin árbir sýdıa, sottyń árbir tóraǵasy óziniń jumysyn jaqsartýǵa, kemshiligin joıýǵa umtylady», - dedi Joǵarǵy sot tóraǵasy.
Onyń aıtýynsha, memlekettik bılikte sottyń alatyn orny erekshe. Sondyqtan jurt sotqa sońǵy úmitin arqalap keledi, ádildik suraıdy. Kóńili qalsa, sotqa emes búkil memlekettik bılikke ókpeleıdi.
«Sondyqtan kez kelgen azamat zańdy syılaıtyn, zańdy qurmetteıtin qoǵamda ómir súrgisi keledi. Nege? Óıtkeni sotyna sengen el óziniń keleshegine senedi, balalaryna alańdamaıdy. Olar memlekettik syılaıdy, Otanyn qurmetteıdi. Tártipke bas ıip, ýaıymsyz ómir súredi. Al ınvestorlar ne deıdi? Bul eldiń soty ádil, dep qarajatyn qoryqpastan sol eldiń ekonomıkasyna salady. Osy jóninde Elbasy talaı aıtyp júr. Degenmen biz osyny ylǵı esimizde ustaýymyz kerek», - dedi Jaqyp Asanov.
