Sottyń qateliginen kinásiz azamat 20 jylyn temir tordyń ar jaǵynda ótkizgen
ASTANA. QazAqparat - Adam óltirgendigi úshin sottalǵan ıtalıandyqty kinásiz dep taýyp túrmeden shyǵardy. Ol 20 jylyn temir tordyń ar jaǵynda ótkizdi, dep jazdy La Stampa.
Basylymnyń derekterine qaraǵanda, áńgime 55 jastaǵy Taranto provıntsııasyndaǵy Fraganıano qalasynyń turǵyny Andjelo Massaro (Angelo Massaro) jaıly bolyp otyr.
Katanzaro qalasynyń soty ony 1995 jyly 22 qazanda Lorentso Fersýrellany (Lorenzo Fersurella) óltirdi degen aıyppen 24 jylǵa bas bostandyǵynan aıyrǵan.
Aıyptaý Massaronyń telefonyn tyńdaý jáne aqparshynyń bul qylmys jaıly úshinshi bir adamnan alǵan málimetine negizdelgen. Keıinnen onyń aıtqandarynyń shyndyqqa janaspaıtyndyǵy anyqtalady.
Budan basqa Massaronyń advokaty adam ólimi bolǵan túni klıenti ózge jerde bolǵanyn dáleldeı aldy.
Nátıjesinde Katanzaro qalasynyń sol soty apellıatsııalyq shaǵymdy qanaǵattandyrdy jáne ony bosatý týraly sheshim shyǵardy.
Endi ıtalıandyqtyń qorǵaýshylary ádilet mınıstrliginen ony zańsyz bas bostandyǵynan aıyrǵany úshin ótemaqy talap etpek.
Al túrmeden shyqqan Massaro 20 jyl boıy shekken azabyn eshnárse óteı almaıtyndyǵyn, degenmen qatelikke boı aldyrǵandardyń jazalanýyna, ádildikke qol jetkizýge árekettenetindigin málim etti.
Túrmede otyrǵan jyldar ishinde ıtalıandyq Katanzaro ýnıversıtetiniń zań fakýltetin támamdaǵan.
