Sottyń eń basty mindeti ádildikti qamtamasyz etý - Elbasy
ASTANA. Qarashanyń 18-i. QazAqparat /Aıdar Ospanalıev/ - Sot óndirisin jetildirý ınnovatsııalyq tehnologııalardy keńinen paıdalanýmen tikeleı baılanysty. Aldyńǵy qatarly sot tájirıbesi qaǵaz júzindegi qujat aınalymynan bas tartyp, elektrondy tehnologııalarǵa kóshýdi talap etedi.
Bul protsess qazirgi sot júıesiniń basty bazasyna aınalýy tıis. Bul másele jóninde búgin Elbasy Nursultan Nazarbaev Astanada ótip jatqan Qazaqstan Respýblıkasy sýdıalarynyń V sezinde aıtty, dep habarlaıdy QazAqparat.
Prezıdenttiń sózinshe, «Elektrondy úkimet» tehnologııasy sot júıesiniń qoljetimdiligi men ashyqtyǵyn qamtamasyz etýi tıis. «Sottarǵa qoıylatyn basty talap sot aktileri sapaly ári minsiz oryndalýy tıis. Qazirgi tańda Parlament sot qyzmetine qatysty zańdardy qarap bitirýge taıaý. Sondyqtan bizge ol qujattardyń múmkindikterin júzege asyrýǵa asyǵý qajet. Sottyń ádildigin qamtamasyz etip, azamattardyń quqyqtaryn senimdi qorǵaý úshin sýdıalar men sottardy mamandandyrýdy belsendi júrgizý kerek.
Bul ýaqyt talaby jáne halyqaralyq norma. Bul máseleni túbegeıli zerttep, sheshý kerek», dedi N.Nazarbaev.
Sondaı-aq sottar men sýdıalarǵa qyzmetine qatysy joq quzyr berilmeý tıis nemese olar óz qyzmetterinen tys máselelermen aınalyspaýlary kerek. «Sottyń eń basty mindeti ádildikti qamtamasyz etý», dedi Elbasy.
