Sottylyq týraly jáne taǵy da 20-dan astam anyqtama memlekettik qyzmet kórsetý tiziliminen alyp tastalmaq

NUR-SULTAN. QazAqparat – Memlekettik qyzmet kórsetý máseleleri jónindegi vedomstvoaralyq komıssııa (VAK) kezekti otyrysta melekettik organdarmen birlesip Memlekettik qyzmetter tiziliminen birqatar anyqtamalardy alyp tastaý máselesin talqylady. Otyrysta 24 aqparattyq anyqtama týraly sóz boldy, dep habarlaıdy QazAqparat tilshisi Tsıfrlyq damý, ınnovatsııalar jáne aeroǵarysh ónerkásibi mınıstrliginiń baspasóz qyzmetine silteme jasap.

«Búgingi tańda memlekettik tizilimde 694 qyzmet bar, onyń 49-y - anyqtamalar. Azamattar bul anyqtamalardy basqa memlekettik organǵa berý úshin bir memlekettik organnan suratýy kerek. Bul shamadan tys qaǵazbastylyq pen bıýrokratııaǵa ákeledi. Sondyqtan, memlekettik organ azamattardyń ruqsatyn ala otyryp, óz áriptesterinen ózdiginen suraı alatyn málimetteri bar birqatar anyqtamalardy alyp tastaý usynylady», - dedi mınıstrliktiń Memlekettik qyzmetter komıtetiniń tóraǵasy Ádilet Kósherbaev.

Bul rette memlekettik organdar aqparattyq júıelerdegi derekter bazasyn biriktirý arqyly qajetti málimetterdi ala alady. Al aqparatty basqa adam nemese negizgi aqparattyq júıelerdi paıdalanýǵa ruqsaty joq uıym suratqan jaǵdaıda, azamat úshinshi tulǵa servısi arqyly ózi týraly málimetterdi usynýǵa ruqsat bere alady nemese bas tarta alady.

Tizilimnen shyǵarýǵa usynylǵan anyqtamalar qatarynda «Sottylyqtyń bolýy nemese bolmaýy týraly», «Ýaqytsha eńbekke jaramsyzdyǵy», «Memlekettik jer kadastrynan málimetter berý» jáne t. b.anyqtamalar bar.

Ótken komıssııa otyrystarynyń sheshimimen 5 túrli anyqtama alynyp tastalǵan. Olardyń qatarynda mekenjaı anyqtamasy, joǵary oqý ornyn jáne odan keıingi bilimdi aıaqtamaǵan tulǵalarǵa anyqtama berý jáne t.b. bar. Bul qaǵaz qujat aınalymyn 14 mln qujatqa qysqartýǵa múmkindik berdi.

Vedomstvoaralyq komıssııanyń tóraǵasy – Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev memlekettik organdardyń osy protseske tehnıkalyq daıyndyǵynyń mańyzdylyǵyn aıtyp ótti.

«Memleket basshysy bizge keńes alý, anyqtama alý jáne ótinish berý operatsııalaryn onlaınǵa kóshirý mindetin tapsyrdy. Biz bul turǵyda memlekettik qyzmetterdi proaktıvti tásilmen kórsetý kerek dep sanaımyz. Sondyqtan memlekettik organ ózi ala alatyn anyqtamany joıýy kerek. Alaıda, barlyq memlekettik organdar buǵan tehnıkalyq jaǵynan daıyn bolýy qajet», - dedi mınıstr.

Sondaı-aq, otyrysta eńbek jáne halyqty áleýmettik qorǵaý, mádenıet jáne sport, qarjy, ishki ister, densaýlyq saqtaý jáne t. b. salalardaǵy memlekettik qyzmetterdi ońtaılandyrý jáne avtomattandyrý máseleleri qaraldy.