Sottyq tergeý ınstıtýtyn odan ári damytý qajet-senator B. Imashev
ASTANA. 10 qarasha. QazAqparat - Sottyq tergeý ınstıtýtyn odan ári damytý jáne ony qylmystyq úderisterde qoldaný aıasyn keńeıtý qajet. Bul týraly búgin Parlament Senatynda ótken «Qazaqstan Respýblıkasynyń qylmystyq is júrgizý zańnamasynda sottyq tergeý ınstıtýtyn damytý» taqyrybyna arnalǵan dóńgelek ústelde Senattyń Zańnama jáne quqyqtyq máseleler komıtetiniń tóraǵasy Berik Imashev aıtty.
Onyń aıtýynsha, bul sharalar sot tergeý ınstıtýttaryn nyǵaıtady, qylmystyq sot óndirisi aıasyna túsken adamnyń quqyǵy men bostandyǵyn qorǵaýdy qamtamasyz etedi.
Sonymen qaar, senator sottyq tergeýdi sottaý isindegi mańyzdy kezeń retinde ataı kelip, qylmystyq isterdi sheshýde sottyq tergeýdiń osy kezeńi tergeý nátıjeleriniń eń shynaıy bolýyna kepildendiretin qylmystyq protsesterdiń barlyq qaǵıdalary barynsha tolyq ashylatynyn atap ótti. «Sóıtip, qylmystyq izdestirý organdardyń qorytyndylary men sheshimderiniń zańdylyǵy men negizdemesin tekserý qamtamasyz etiledi», dedi depýtat.
Otyrys barysynda sot júıesin damytý jáne sotqa deıingi óndiriste sot baqylaýy aıasyn kezeń-kezeńmen keńeıtý, qylmystyq-is júrgizý zańnamasyndaǵy sottyq tergeý evolıýtsııasynyń keleshegi, sottyq tergeýdegi sottyń róli, aldyn ala jáne sottyq tergeýdiń ózara baılanysy máseleleri talqylandy.
Pikir almasý barysynda sottyq tergeýdi memlekettik aıyptaýshy turǵysynan qarastyrýǵa, sottyq tergeýdegi qylmystyq isti dáleldeý máselelerine, sottyq tergeýge sáıkes aldyn ala tergeý men onyń mekemege qatysyna, sottyq tergeýdiń qylmystyq protsestegi tıimdi ınstıtýt ekenine nazar aýdaryldy.
Dóńgelek ústel otyrysyna Senat tóraǵasynyń orynbasarlary Muhambet Kópeev pen Aleksandr Sýdın, Parlament depýtattary, Konstıtýtsııalyq Keńes pen Joǵary Sot Keńesiniń, Advokattar odaǵynyń basshylary, Prezıdent Ákimshiliginiń, quqyq qorǵaý jáne sot júıesiniń, halyqaralyq jáne qoǵamdyq uıymdardyń, ǵalymı ortalardyń ókilderi qatysty.
Talqylaýdy qorytyndylaı kelip B.Imashev sottyq tergeýdiń ózekti máseleleri jáne ony odan ári jetildirý baǵyttary boıynsha pikirsaıystyń tabysty bolǵanyn atap ótti. Senator atap ótkendeı, aıtylǵan eskertpeler men usynystardyń bári egjeı-tegjeıli zerdelenip, pysyqtalady jáne zań shyǵarý úderisterinde paıdalanylatyn bolady.
