Sottardyń áreketterine shaǵymdanýshylar 9 paıyzǵa kemidi - M.Álimbekov
ASTANA. Qańtardyń 15-i. QazAqparat /Aıdar Ospanalıev/ - Arnaıy júrgizilgen taldaý jumystary elimizdegi sottardyń áreketterine shaǵymdanýshylar sanynyń 9 paıyzǵa tómendegendigin kórsetip otyr. Bul týraly sottardyń 2009 jyly atqarǵan jumystarynyń qorytyndysy boıynsha ótken keńeıtilgen otyrysta Joǵarǵy sot tóraǵasy Musabek Álimbekov aıtty,
dep habarlaıdy QazAqparat.
Onyń málimetteri boıynsha, elde ákimshilik jaýapqa tartylǵan sýdıalar sany da aıtarlyqtaı kemigen. 2008 jyly ákimshilik jaýapqa tartylǵan sýdıalar 188 bolsa, bıylǵy jyly olar 151-di qurap otyr. Olardyń arasynda 16 sýdıaǵa qatysty qyzmetinen bosatý jóninde sheshim qabyldandy. «Esesine, sot alqasy qaraǵan materıaldar sany ósti. 2008 jyly olar 4 sýdıaǵa qatysty isti qarasa, ótken jyly 14 sýdıanyń isin talqyǵa saldy. Taǵy 5 sýdıanyń
isin qaraý aǵymdaǵy jylǵa qaldyryldy. Osy talqylaýlardyń nátıjesinde 7 sýdıa qyzmetine sáıkes emes dep tabyldy. Al 2008 jyly qyzmetine sáıkes emestigi jónindegi sheshim nebári 3 azamatqa qatysty shyǵarylǵan bolatyn. Osylaısha oblystyq sottardyń plenarlyq otyrystarynda sot alqasynyń áleýeti sot salasyn kezdeısoq adamdardan tazartýda keńinen paıdalanylatyn boldy», dedi Joǵarǵy sot tóraǵasy.
