Sottar jumysy zamanaýı formatqa keltiriledi
NUR-SULTAN. QazAqparat – Parlament Senatynyń jalpy otyrysynda «QR Azamattyq protsestik kodeksine sottar jumysynyń zamanaýı formattaryn endirý, artyq sot rásimderi men shyǵyndaryn qysqartý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.
QR Joǵarǵy sotynyń Azamattyq ister jónindegi sot alqasynyń tóraǵasy Meırambek Taımerdenovtiń aıtýynsha, zań jobasy úsh baǵyttan turady. Birinshiden, sottar jumysyn zamanaýı formatqa keltirý. Ekinshiden, azamattyq protsestegi tıimdilikti arttyrý, úshinshiden, sot isin júrgizýdegi tsıfrlandyrý qamtyldy.
«Bul túzetýler bizdiń qoǵamǵa, azamattarǵa ne beredi? Sottarǵa «nege sýdıa isti qaraǵanda onyń aq-qarasyna tereń úńilmeıdi», «nege tek usynylǵan dálelderdi qanaǵattandyryp, sheshim shyǵarady» degen syn aıtylady. Osyǵan sebep - qoldanystaǵy Azamattyq protsestik kodekstiń talaby. Osy oraıda sýdıanyń qoly baılaýly. Bul problemany sheshýdiń bir ǵana joly bar, ıaǵnı sýdıanyń protsestik rólin túbegeıli ózgertý. Ádil sheshim qabyldaý úshin ol daýdy jan-jaqty, egjeı-tegjeıli túsinip, anyqtaýy qajet. Bul degenimiz, sýdıa protsestik jaǵynan erkin bolýy qajet. Qandaı ýájdi nemese dálelderdi zertteý kerek ekenin ol ózi anyqtaýy qajet. Bul biz ashyp otyrǵan jańalyq emes, ozyq damyǵan elderdiń sottarynda qalyptasqan tájirıbe. Sondyqtan osy tájirıbeni paıdalanbaqpyz», - dedi Azamattyq ister jónindegi sot alqasynyń tóraǵasy.
Zań jobasynyń negizgi mindetteri: sottardyń azamattyq isterdi sheshý, protsestiń jaryspalylyǵy qaǵıdattaryn ustaný tásilderin ózgertý;
azamattyq sot isin júrgizýde tatýlastyrý rásimderin qoldanýdy keńeıtý;
artyq protsestik áreketter men sot aktilerin qysqartý;
sot isin júrgizýde elektrondyq servıster men tehnıkalyq quraldardy qoldanýdy keńeıtýdi qamtamasyz etý.
Zań jobasynda sottyń kúrdeli emes máselelerdi taraptardy shaqyrýsyz qaraýymen baılanysty protsestik áreketterdi ońtaılandyrýǵa baǵyttalǵan normalar qamtylǵan. Ońaılatylǵan (jazbasha) is júrgizý tártibindegi isterdi elektrondyq formatta qaraý usynylady.
Zań jobasy sondaı-aq elektrondyq hattamaǵa, protseske qashyqtan qatysýǵa, protseske qatysýshylardyń elektrondyq gadjetterdi jáne basqa tehnıkalyq quraldardy paıdalanýyna qatysty basqa jańalyqtardy da qarastyrady.
Usynylyp otyrǵan Zań jobasy azamattyq sot isin júrgizýge qatysýshy adamdardyń quqyǵyn, bostandyǵyn jáne mindetterin qozǵaıdy, protsestik áreketterdi ońtaılandyrýǵa, protsestik únemdi arttyrýǵa jáne artyq protsestik áreketter men shyǵyndardy boldyrmaýǵa baǵyttalǵan, sondaı-aq sot isin júrgizýdiń konstıtýtsııalyq qaǵıdattaryn damytady.
