Sottar para úshin qatańyraq jazalasa deımiz - Agenttik
«Biz bul baǵyttaǵy jumysty umytpaýymyz kerek. Sebebi, sybaılas jemqorlyqpen kúreste bul mańyzdy qural bolyp tabylady. Sybaılas jemqorlyqqa qarsy kúres salasyndaǵy zańdardyń basym bóligi qazir jumys istep tur. Dese de, shetelderden ońtaıly tájirıbeler kórip jatsaq, olardy sińire bilýimiz kerek. Máselen, Germanııa Qylmystyq kodeksin taldaı otyryp, usynarym: parany alý nemese berý úshin ǵana emes, usyný jáne parany alýǵa keliskeni úshin jazalaý da kerek. Bizdiń oıymyzsha, sottar bul rette qatańyraq jaza berýi tıis», - deıdi Aldan Mankeev vedomstvoda ótken baspasóz máslıhaty barysynda.
Sonymen birge, ol memlekettik qyzmetshilerdiń kiristeri týraly málimetterdi memlekettik organdardyń saıttaryna jarııalaý kerek dep esepteıdi. Onyń aıtýynsha, ІІM-de naqty mynadaı másele bar: polıtsııa qyzmetinde eńbektiń baǵalanbaıtyny seziletindikten, bul jaǵdaı jemqorlyq qylmysqa ıtermeleıdi.
«Qyzmetshilerdiń arasynda saýalnama júrgize otyryp, polıtseılerdiń ózi qyzmettik kólik quraly úshin shyǵyndalatynyn anyqtadyq. Máselen, kólikti jóndeý, dóńgelegin aýystyrý, ony kúndelikti jýý, motor maıy men ózge de suıyqtyqtaryn quıý sekildi shyǵyndardyń bárin olar óz qaltasynan shyǵarady. Keıde janar-jaǵarmaıdyń jetkilikti deńgeıde berilmeıtini de bar. Mine, osy jerden-aq aılyǵy 75-100 myń teńgelik qyzmetshi óz jalaqysyn bul shyǵyndarǵa shyǵarǵysy kelmeıtini anyq. Osy jaǵdaı polıtsııa qatarynda jemqorlyqqa sebep bolady degen oıdamyn», - deıdi ol.