Sottan tys bankrottyq rásimdegen azamattar qandaı shekteýlerge tap bolady

ASTANA. QazAqparat – Sottan tys bankrottyq rásimdegen azamattar birqatar shekteýlerge tap bolady. Bul týraly Qarjy vıtse-mınıstri Erjan Birjanov ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

«Sottan tys bankrottyq rásimdegen azamattar úshin qandaı saldar týyndaıtynyn aıtqym keledi. Bankrottyq rásimdegen azamattardyń belgili bir jaýapkershilikteri paıda bolýy múmkin. Atap aıtsaq, jeke tulǵa bankrot dep tanylǵan kúnnen bastap onyń moınyndaǵy borysh mindettemesiniń kúni ótken bolyp sanalady. Bul – jaqsy jaǵdaı. Al, bankter turaqsyzdyq aıyppulyn, ósimpuldy jáne syıaqy ótemin esepteýdi toqtatady. Bereshekti óndirip alý týraly sot sheshimderi toqtatylady. Boryshkerge nesıe alý, kepildik berý boıynsha mámileler jasaýǵa tyıym salynady», - dedi vıtse-mınıstr.

Sondaı-aq, ol atalǵan protsedýranyń bári tsıfrlyq formatta jumys isteýi múmkin ekenin aıtty.

«Sottan tys bankrottyq «Elektrondyq Úkimet» veb-portalymen baılanysty bolady. Kez kelgen azamat saıtta aryz berý arqyly júgine alady. Kerekti memlekettik organdar sonyń negizinde saraptama júrgizedi. Qorytyndysyn daıyndap, kirister komıtetine joldaıdy. Sońǵy sheshimdi Memlekettik kirister komıteti búkil memlekettik organdardan qorytyndy alǵannan keıin shyǵarady», - dedi Erjan Birjanov.