Sottalýshynyń qolynan mert bolǵan túrme qyzmetkeriniń otbasyna materıaldyq kómek kórsetildi
KÓKShETAÝ. QazAqparat - Otan qorǵaýshy kúni Aqmola oblysy boıynsha qylmystyq atqarý júıesi departamentiniń ókilderi osydan 10 jyl buryn qyzmetik mindetin atqarý kezinde opat bolǵan ETs-166/24 mekemesiniń qyzmetkeri Olga Vasılevskaıanyń otbasynda boldy, dep habarlaıdy QazAqparat tilshisi vedomstvonyń baspasóz qyzmetine silteme jasap.
Pavlodar zań kolledjin úzdik bitirip, qolyna qyzyl dıplom alǵan Olga Vasılevskaıa Kókshetaý qalasyndaǵy qonys kolonııasynda jasaq bastyǵy bolyp qyzmet atqardy. Rýhy myqty, adal da erjúrek, qaısar qyz óziniń jastyǵyna qaramastan jumysqa degen talapshyldyǵy men eńbekqorlyǵynyń arqasynda áriptesteriniń arasynda úlken bedelge ıe boldy. Kóńili jarqyn, sertine berik, ǵumyryn shynaıy eńbekke arnaǵan jas leıtenant Olgaǵa áriptesterinen bólek, sottalǵandar da qurmetpen qaraıtyn. Alaıda, onyń ómiri qysqa boldy. Túzeý mekemesinde jazasyn ótep jatqan «Qubyjyq» atty sottalýshynyń qolynan kóz jumdy.
Otan qorǵaýshy kúni Aqmola oblysy boıynsha qylmystyq atqarý júıesi departamentiniń ókilderi Olga Vasılevskaıanyń otbasyna baryp, anasy Elena Konstantınovnaǵa materıaldyq kómek kórsetti.
«Biz Aqmola oblystyq qylmystyq atqarý júıesi departamentiniń jeke quramy antqa adal, dosqa berik áriptesimizdiń jarqyn beınesin umytpaımyz. Ol osy jolda aıanbaı eńbek etip kele jatty. Sportty súıdi, mansabyn jaqsy qurýǵa tyrysty. Ol týraly áriptesteri tek oń sózder ǵana aıtady», - dedi qylmystyq atqarý júıesi departamenti bastyǵynyń orynbasary Marat Ábdirahmanov.
Olganyń ómirden ozǵanyna 10 jyl ótse de, onyń jarqyn beınesi áriptesteriniń kóz aldynda. Búgingi tańda departament aýmaǵynda oǵan eskertkish memorıal taqta ornatylǵan. Onyń qurmetine jyl saıyn departament qyzmetkerleriniń qatysýymen basketboldan jarys uıymdastyrylyp turady.
«Ol sportqa jaqyn qyz bolatyn, voleıbol, basketboldy jaqsy kóretin, Pavlodar zań kolledjinde voleıbol komandasy kapıtany boldy», - dep eske aldy kadrlar qyzmeti bólimshesiniń bastyǵy Dınara Mustafına.
Anasy Elena Konstantınovna ózin qoldap kelgen Qylmystyq atqarý júıesi departamentiniń qyzmetkerlerine analyq alǵysyn aıtty.
