Sottalýshylarǵa arnalǵan qazaqstandyq elektrondy bilezikti paıdalaný quny qansha
ASTANA. QazAqparat - QR Іshki ister mınıstri Qalmuhanbet Qasymov búgin Májilistegi Úkimet saǵatynan keıin sottalýshylarǵa arnalǵan Qazaqstanda shyǵarylatyn elektrondy bilezikti paıdalaný qunyn atady, dep habarlaıdy QazAqparat.
«Biz bilezikterge aqsha shyǵyndaǵan joqpyz. Ol memlekettik-jekeshelik seriktestik esebinen jasalady. Qazirgi ýaqytta ınvestor atalǵan bilezikterdi shyǵaratyn zaýyt qurylysyna qarjysyn salýda. Biz bir jyl boıy atalǵan bir bilezikti paıdalanǵan úshin shamamen 34 myń teńge tóleıtin bolamyz», - dedi ol BAQ ókilderiniń saýalyna oraı.
Sonymen qatar ol elektrondy bilezikterdi engizý kelesi jylǵa josparlanyp otyrǵandyǵyn aıtty.
Buǵan deıin habarlaǵanymyzdaı, Talǵarda jazasyn óteýshilerge arnalǵan elektrondy bilezik shyǵaratyn zaýyt salyndy.
Atalǵan zaýyttyń ónimi kelesi jyldan bastap jazaǵa kesilgen 6 myń adamǵa taǵylady.
