Sottalýshylarǵa 8 keli esirtki, 40 lıtr ishimdik ótkizbek bolǵan
NUR-SULTAN. QazAqparat - 2020 jyldan basynan beri elimizdiń túrmelerindegi sottalýshylarǵa 8 keli esirtki men 40 lıtr spırttik ishimdik jetkizbek bolǵandardyń joly kesildi. Bul týraly búgin QR Іshki ister mınıstrligi Qylmystyq atqarý júıesi komıtetiniń tóraǵasy Janat Eshmaǵambetov aıtty, dep habarlaıdy QazAqparat tilshisi.
«Ádette kolonııaǵa tyıym salynǵan zattardy jetkizýdiń joldary árqıly. Olar - qorshaý arqyly laqtyryp ketý, azyq-túlik sálemdemesi men banderol arqyly nemese uzaq merzimdi kezdesý uıymdastyrý barysynda týystary arqyly ótkizýge tyrysý. Jyl basynan mekeme aýmaǵyna tyıym salynǵan zattardy ótkizýge tyrysýdyń 400-den astam oqıǵasynyń jolyn kestik. Shamamen 600 uıaly telefon, 8 kelige jýyq esirtki jáne 40 lıtrden astam spırttik ishimdik tárkilendi», - dedi komıtet tóraǵasy Іshki ister mınıstrligi alańynda ótken baspasóz máslıhatynda.
Onyń atap ótýinshe, QR Ulttyq gvardııasymen birge tekserý toby kúsheıtildi. Ulttyq gvardııa jáne polıtsııa departamenti bólimshelerimen birge mekeme aýmaǵyn sholǵyndaý uıymdastyrylyp, qaraýyl munaralaryna baqylaý kúsheıtildi. Sonymen qatar ınjenerlik-tehnıkalyq quraldar da jetildirilip jatyr.
«Ókinishke oraı, osynaý teris jaıtqa qyzmetkerlerimizdiń de qatysy bar biren-saran oqıǵa oryn alǵanyn moıyndaýymyz kerek. Jyldyń basynan beri ózindik qaýipsizdik bólimshemiz mundaı 8 qyzmetkerdi ustady. Olardyń barlyǵy teris qylyqtary úshin jumystan shyǵaryldy», - dedi Janat Eshmaǵambetov.
