Sottalýshy aýyr syrqatqa shaldyqsa sot zalynan bosatylmaq – zań jobasy

ASTANA. QazAqparat – Elimizde aýyr syrqatqa ushyraǵan sottalýshylardy sot zalynan birden bosatý usynyp otyr. Bul týraly búgin Májiliste tıisti zań jobasyn tanystyrǵan QR Іshki ister mınıstriniń birinshi orynbasary Marat Qojaev aıtty, dep habarlaıdy QazAqparat tilshisi.

«Norma jazasyn ótep jatqan adamdarǵa aýyr aýrýlary bolǵan kezde adamgershilikpen qaraýǵa baǵyttalǵan. Qylmystyq-protsestik kodeksiniń 471-babyna sottalǵandy bosatý nemese jazanyń ótelmegen bóligin aýrýyna baılanysty jazanyń neǵurlym jeńil túrimen aýystyrý týraly sot qaýlysyn dereý oryndaýdy kózdeıtin tolyqtyrý engizý usynylady», - dedi ol.

Onyń aıtýynsha, búginde ártúrli aýyr syrqattarmen aýyratyn sottalǵandarǵa arnalǵan materıaldar Qylmystyq-atqarý júıesi departamentiniń Arnaıy medıtsınalyq komıssııasynyń qorytyndysynan keıin sotqa usynylady. Bul rette olardy sotta qaraý jáne qaýlynyń zańdy kúshine enýi belgili bir ýaqytty alady. Máselen, 2015 jyldan bastap 2022 jylǵa deıin 441 naýqas sottalǵandardyń 75-i sottardyń materıaldardy qaraýyna deıin ómir súrmegen. Al 31-i sot qaýlysy zańdy kúshine engenge deıin qaıtys bolǵan.

«Osyǵan baılanysty sottalǵandardy olarda aýyr syrqattar bolǵan jaǵdaıda tikeleı sot zalynan bosatý usynylady», - dedi Marat Qojaev.