Sottalýshy Sherzattyń ákesin onyń ólimine kúdikti dep tanýdy surady

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysynda jaryssóz ótip jatyr.

Sot otyrysynyń jaryssóz kezeńinde sottalýshy Nurbol Toqtaýbaev óz oıyn aıtty. Ol sońǵy sózinde Sherzat Polattyń ólimine Qarjaýbaı Nurymovty kúdikti dep tanýdy ótindi.

— Men istegen áreketterime baılanysty óz kinámdi jartylaı moıyndadym. Men ózimdi aqtaýǵa tyryspaımyn. Oqıǵa bolǵan túni eshqandaı qylmys jasaý oıymen shyqqan joqpyn. Maǵan dosym Darhan Áskentaı habarlasyp, ózin uryp ketkennen keıin kómek surady. Men tek dosymnyń jaǵdaıyn anyqtaý úshin bardym. Meniń oqıǵa bolatyn túni aldyn ala adamdar tobyn quryp, sóz baılasyp, tóbeles shyǵarý nıetim bolǵan joq. Kerisinshe jábirlenýshi Nurymovty sabyrǵa shaqyryp, máseleni janjalsyz sheshýge tyrysyp júrdim jáne «hýtorskıı», «densaýlyqty qoıyp tastaısyń» degen áńgime bolǵan emes. Egerde men ondaı áńgime aıtqan bolsam, Nurymov maǵan júgiretin edi ǵoı. Al ol bolsa, kerisinshe kóliktiń janynda tynysh turǵan Darhan Áskentaıǵa pyshaq alyp júgirdi. Ǵaıypbaev bizge myltyqty atqannan keıin eki ret teptim, sol úshin keshirim suraımyn. Maǵan prokýror QR Qylmystyq kodeksiniń 293-baby 3-bóligimen aıyp taǵyp otyr, men ol aıyppen kelispeımin. Sonymen qatar Sherzat Polattyń ólimine Qarjaýbaı Nurymovty kúdikti dep tanyp, oǵan qatysty qylmystyq is qozǵaýlaryńyzdy suraımyn. Men úılengenmin jáne buryn sottalmaǵanmyn. Turaqty jumys isteıtin ornym bar. Meniń túzelýge múmkindigim bar, men qoǵamǵa qaıta oralyp, zańdy ómir súrýge daıynmyn. Qurmetti sot, istegen áreketim úshin jaýapkershiligimdi túsinip, sizden qatań jaza emes, jeńil jaza qoldanýyńyzdy suraımyn. Men úshin bul ómirlik sabaq boldy, — dedi ol.

Nurbol Toqtaýbaevtan keıin onyń inisi Azamat Toqtaýbaev sóz sóıledi. Ol bul oqıǵadan keıingi ishki arpalysy kez kelgen jazadan aýyr ekenin aıtty.

— Men bul oqıǵaǵa deıin de, keıin de eshkimge qasaqana zııan keltirýdi maqsat etken joqpyn. Oqıǵa bolǵan túni qylmys jasaý nıetimmen shyqqan joqpyn. Maǵan týǵan aǵam Nurbol habarlasqannan keıin bardym. Qurmetti sot, eshqandaı pyshaq ustamadym, eshkimge qasaqana kúsh qoldanǵan joqpyn, eshkimge pyshaq siltegen joqpyn. Men toppen kelgenderdiń biri bolsam da, qolymda pyshaq bolǵan joq. Naqty kúsh qoldaný áreketine qatyspaǵan tulǵamyn. Biraq sol jerde júrgenim úshin búgin de tolyq jaýapqa tartylyp otyrmyn. Men ózimdi qoǵamǵa qaýipti tulǵa dep eseptemeımin. Kerisinshe, sol túni tek aǵaıyndyq sezimmen bardym. Bul jaǵdaı men úshin ómirdegi úlken sabaq boldy. Meniń osy oqıǵadan keıingi ishki arpalysym kez kelgen jazaǵa qaraǵanda aýyr. Men jaqsylyqty qalaımyn, biraq bir sáttik álsizdikpen qatelikke boı aldyrýym, bul — sol oqıǵa kúni sol jerde bolýym, — dedi Azamat Toqtaýbaev.

Sonymen qatar sottalýshy óziniń otbasylyq jaǵdaıy týraly aıtyp, sottan ádildik surady.

— Qurmetti sot, meniń otbasym bar, 1 jasqa tolmaǵan balam bar. Qazirgi tańda áıelim bala tárbıesimen úıde otyr. Men otbasylyq jaǵdaıymda jalǵyz asyraýshymyn. Osy sot protsesinde men istegen qateligimdi ishteı 100 ret moıyndadym. Búgingi tańda sol jaqqa barǵanym úshin shyn júrekten ókinemin. Qurmetti sot, sizden ádildik suraımyn. Jazadan jaltarý úshin emes, aqıqat, zań úshin, — dedi Azamat Toqtaýbaev.

Eske salaıyq, keshe prokýror 7-23 jyl arasynda jaza surady.

Sonymen qatar prokýror kýáger qyzdardyń is-áreketin qaıta tekserýdi alǵa tartty.

Al sottalýshynyń advokaty Sherzattyń ákesine qatysty is qozǵaýdy ótindi.

Búgin Darhan Áskentaı men Ravıl Sákıev sońǵy sózin aıtty.