Sottalýshy ózine taǵylǵan aıyppen taǵy da kelispedi

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.

Sotta aıyptalýshy Darhan Áskentaı jaýap berip jatyr.

Ol oqıǵa ornyna adamdardyń qalaı jınalǵanyn aıtty.

— Nurǵanatpen sóılesip jatqan kezde Nurbol ekeýimizge pyshaqpen oqtaldy. Ne úshin pyshaq alyp júgirgenin túsinbeı qaldym. Sol ýaqytta aýzyna kelgenin aıtty. Sol jerde taǵy chekti kórseteıin degende telefondy qolymnan julyp aldy, dúken ishine kirdim, sosyn qaıtaryp berdi. Dúkennen shyǵyp jatqan kezde 1 kólik kelip toqtady. Іshinen balalar shyqty. Meni uryp jibergen jerde Nurqanat, Sherzat, sosyn Sherzattyń 2-3 dosy turdy, — dedi ol.

Sottalýshy jappaı tóbeles Qarjaýbaı Nurymovtyń pyshaq alyp shyǵýynan bastalǵanyn aıtty. Ol janjal kezinde adamdardy ajyratýǵa tyrysqanyn jáne sol úshin ózi de soqqy alǵanyn atap ótti.

— Sosyn Nurbol bireýmen sóılesip tur eken. Balalar kelgennen keıin keıbireýi dúkenge kirdi, qalǵandary syrtta áńgimelesip turdy. Nurboldan bireý «ne boldy, kimdi uryp jiberdi» dep surady. Sóılesip turǵan kezde Qarjaýbaı shyǵyp, pyshaqpen oqtaldy. Sol kezde bir bala teýip jiberdi. Nurbol «aǵa, bári jaqsy» dep aıtyp jatty. Bir qarap qalǵanymda Sherzat sol jerde turǵan balalardyń birin uryp jiberdi, tóbeles bastalyp ketti. Balalardyń bári dúkenge qarama-qarsy kóshege qaraı ketkennen keıin men artynan bara jattym. Sol sátte myltyq atyldy. Sol jerde taǵy bir dúken bar, men soǵan qaraı júrip kettim. «Toqtańdar, atam» degen daýys shyqty jáne myltyq atyldy. Men kútip turyp qaldym, sonda Nurboldy kórdim. Onyń artynan bara jatsam, bir bala qulap jatyr eken. Aq ne sur kıimdegi bala «skoryı» dep aıqaılap jatty. Sol jerde Nurqanat qulady. Balalar alysyp jatqannan keıin «qoı» dep aıttym. Kelgen balalardy buryn-sońdy kórmegennen keıin, «qoıyńdar» degennen keıin 1-2 soqqy aldym. Sosyn ózim tómen qaraı túsip kettim. Kólikke qaraı baraıyn ba dep turǵan kezde Nurboldyń «kettik» degen daýysyn estidim. Sosyn kólikke otyryp ketip qaldym, — dedi sottalýshy.

Advokat Darhan Áskentaıdan Qylmystyq kodekstiń 293-baby 3-bóligi boıynsha taǵylǵan aıypqa qatysty qanshalyqty kelisetinin surady.

— Bul aıyppen kelispeımin. Qurmetti sot, ózimniń is-áreketime baılanysty laıyqty jaza berýińizdi ótinemin, — dedi ol.

Eske salaıyq, prokýror oqıǵanyń tolyq hronologııasyn baıandady. 

Aıyptalýshylardyń kópshiligi kináni moıyndaǵan joq.

Sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi.

Sonymen qatar oqıǵa ornyna alǵash barǵan polıtseıler jaýap berdi.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

2024 jyldyń jeltoqsan aıynda Talǵar mańynda Sherzat aǵasynyń denesi tabyldy.