Sottalǵandarǵa medıtsınalyq kómek kórsetý Densaýlyq mınıstrligine 2023 jyly beriledi
NUR-SULTAN. QazAqparat – 2023 jyly sottalǵandarǵa medıtsınalyq qyzmet kórsetý Densaýlyq saqtaý mınıstrligine beriledi. Bul týraly QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.
Onyń atap ótýinshe, Іshki ister mınıstrliginde vedomstvo qyzmetin jetildirý máseleleri boıynsha ashyq onlaın tyńdaýlar ótti. Onda qylmystyq-atqarý júıesin jetildirýge baǵyttalǵan zańnamaǵa engiziletin túzetýler qaraldy.
«Ózekti máselelerdiń biri - sottalǵan adamdardy medıtsınalyq qamtamasyz etý. Kórsetiletin medıtsınalyq kómektiń sapasyn arttyrý jáne halyqaralyq standarttarǵa sáıkestendirý maqsatynda 2023 jylǵa qaraı sottalǵandardy medıtsınalyq qamtamasyz etýdiń barlyq fýnktsııalary Densaýlyq saqtaý mınıstrligine beriletin bolady. Bul is-shara sottalǵandardy medıtsınalyq tekserýdiń, dıagnostıkanyń jáne emdeýdiń qazirgi zamanǵy ádisterin paıdalanýǵa múmkindik beredi», - dedi Nurdildá Oraz.
Sonymen qatar, ol medıtsına qyzmetkerleri ashtyq jarııalaýdy tirkeý nemese dene jaraqatyn salýǵa qatysty sheshim qabyldaǵan kezde olardyń jumysyna mekeme ákimshiliginiń aralasý múmkindigi joıylatyndyǵyn aıtty.
«Ashyq tyńdaý barysynda probatsııa qyzmetiniń esebinde turǵan adamdardyń áleýmettik-quqyqtyq kómek alýyna járdem kórsetý máselesi de qaraldy. Bul fýnktsııa jergilikti atqarýshy organdarǵa beriletin bolady. Óıtkeni zańnamaǵa sáıkes ákimdikter qazirdiń ózinde osy baǵytta kómek kórsetip keledi», - dedi resmı ókil.
Eske salaıyq, 2 maýsymda QR ІІM-de «QR keıbir zańnamalyq aktilerine ishki ister organdarynyń qyzmetin jetildirý máseleleri boıynsha ózgerister men tolyqtyrýlar engizý týraly» zań jobasynyń negizgi erejelerin túsindirý jáne talqylaý boıynsha jarııa onlaın-tyńdaý ótti. Onda Іshki ister mınıstriniń orynbasary Alekseı Kalaıchı QR ІІM Qylmystyq-atqarý júıesi komıteti sottalǵandarǵa medıtsınalyq qyzmet kórsetý fýnktsııasyn QR Densaýlyq saqtaý mınıstrligine beretinin málim etken edi.
