Sottalǵandardyń túrmeden qashý oqıǵasyna oraı Mańǵystaý oblysy boıynsha barlyq túzeý mekemeleri kúsheıtilgen rejımge ótti
ASTANA. Maýsymnyń 22-si. QazAqparat /Qanat Mámetqazyuly/ - Sottalǵandardyń túrmeden qashý oqıǵasyna oraı Mańǵystaý oblysy boıynsha barlyq túzeý mekemeleri kúsheıtilgen rejımge ótti. Bul týraly búgin QR Ádilet mınıstrliginde ótken brıfıng barysynda vedomstvonyń resmı ókili Erbolat Erimbet málim etti,
dep habarlaıdy QazAqparat.
«Búgingi kúni anyqtalǵan málimetter boıynsha túrmeden qashqandar eshqandaı da adamdardy kepilge almaǵan. Qashqandardyń jazasyn óteý boıynsha sottalý sanattary, tolyq málimetteri áli naqtylanady. Jalpy, Mańǵystaý oblysy boıynsha barlyq túzeý mekemeleri kúsheıtilgen rejımge ótti. Al basqa óńirlerdegi mekemeler sáıkes rejımdi saqtaıtyn bolady», dedi resmı ókil.
Esterińizge sala keteıik, búgin, maýsymnyń 22-sinde jergilikti ýaqyt boıynsha tańǵy saǵat 5-tiń shamasynda Mańǵystaý oblysy boıynsha Qylmystyq-atqarý júıesi basqarmasynyń GP-172/1 (Aqtaý qalasy, qatań rejım) mekemesinen 21 adamnan turatyn sottalǵandar toby negizgi qorshaýdan sekirip túsý arqyly qashyp ketken bolatyn. Qazirgi ýaqytta olardyń 8-i quryqtalǵan. Toqtala ketetin jaıt, sottalǵandardyń qashýyna 2 avtomashına men mekeme aýmaǵyna jaqyn kelgen belgisiz qarýlanǵan adamdar kómek kórsetken. Qaıtys bolǵandar men jaralanǵandar bar. Qalǵan sottalǵandardy ustaý boıynsha quqyq qorǵaý organdary shuǵyl-izdestirý sharalaryn júrgizýde.
