Sottalǵandardyń birazyna jasóspirimdermen jumys isteýge tyıym salynady
ASTANA. QazAqparat - Elimizde sottalǵandardyń biraz bóligine jasóspirimdermen jumys isteýge tyıym salynady. Bul týraly búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine qylmystyq zańnamany jetildirý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymyn talqylaý barysynda málim boldy.
Depýtat Nurlan Ábdirovtiń aıtýynsha, atalǵan qujat Qylmystyq kodekstiń jańa redaktsııasyn ázirleýge, qylmystyq jazalaý túrleriniń, qylmys uǵymynyń túbegeıli túrde ózgertilýine baılanysty ázirlengen bolatyn. «Zań jobasy boıynsha Eńbek kodeksine de mańyzdy túzetýler usynylyp otyr. Atap aıtqanda, jasóspirimderge bilim berý, olardy tárbıeleý men demalys sharalary sekildi jáne taǵy da basqa salalarda olarmen jumys isteý múmkindigine shekteý qoıý sheńberin keńeıtý qarastyrylyp otyr. Bul rette ondaı jumystarǵa kisi óltirgen, bireýdiń densaýlyǵyna qasaqana zaqym keltirgen, jynystyq qol suǵylmaýshylyqqa qarsylyq kórsetken, adam saýdasymen aınalysqan adamdarǵa jol berilmeıtin bolady. Budan bólek, halyqtyń densaýlyǵyna jáne adamgershilikke qarsy qylmys istegen adamdar da osyndaı shekteýlerge jatady», - dedi Nurlan Ábdirov. Budan bólek, zań jobasymen esirtki men psıhotroptyq zattardyń bara-bar túrleri týraly túzetý engizilgen. Osylaısha, elimizde esirtki zattardyń aınalymynan bólek, olardyń bara-bar túrlerimen kúres te kúsheıedi. «Óıtkeni, esirtkige qatty uqsas elitetin zattardyń adam ómiri men densaýlyǵyna keltiretin zalaly esirtkiden kem túspeı otyr. Bul - memleketimizdiń aldyna BUU qoıyp otyrǵan talaptarynyń biri», - deıdi depýtat N. Ábdirov.
