Sottalǵandardyń arasynda jazǵy spartakıada bastaldy - QR ІІM
ASTANA. QazAqparat - Búgin respýblıkanyń penıtentsıarlyq júıesinde sottalǵandardyń arasynda jazǵy spartakıada bastaldy, dep habarlady QR ІІM Qylmystyq atqarý júıesi komıtetiniń baspasóz qyzmeti.
«Dástúrli sharanyń negizgi maqsaty túzetý oryndarynda jaqsy moraldyq-psıhologııalyq jaǵdaıdy qalyptastyrý. Sondaı-aq, jazasyn óteýshilerdiń kúndelikti ómirinde dene shynyqtyrý men sportty engizip, salaýatty ómir saltyn nasıhattaý», - dedi QAJ jazasyn óteýshiler arasynda áleýmettik-psıhologııalyq jáne tárbıe jumystaryn júrgizý basqarmasynyń bastyǵy Marat Talasbaev.
Jarystar respýblıkanyń barlyq túzetý mekemelerinde bolady. Sport tártibiniń arasynda fýtbol, voleıbol, ústel tennısi, gir tasyn kóterý jáne basqa da túrleri bar.
