Sottalǵandardyń qoǵamdyq jumys isteý qaǵıdalaryna ózgeris engizildi

ASTANA. KAZINFORM – Іshki ister mınıstri 2025 jylǵy 30 qyrkúıektegi buıryǵymen probatsııa qyzmetiniń qyzmetin uıymdastyrý jáne sottalǵan azamattardyń qoǵamdyq jumysty isteýin uıymdastyrý qaǵıdalaryna ózgerister engizdi.

Jańa ózgeristerge sáıkes, sot úkimin nemese qaýlysyn alǵan kúnnen bastap 5 jumys kúni ishinde jergilikti ákimdik:

- sottalǵan adamnyń turǵylyqty jeri boıynsha qoǵamǵa paıdaly jumys túrin aıqyndaıdy;

- qoǵamdyq jumysty uıymdastyrý týraly ókim shyǵarady;

- probatsııa qyzmetine úkimniń nemese sot qaýlysynyń alynǵany týraly jáne qoǵamdyq jumysty uıymdastyrý jónindegi ókimdi joldaıdy.

Sondaı-aq ákimdik:

- sottalǵan adamdy arnaıy kıimmen (jılet) sondaı-aq qoǵamdyq jumysty isteýge qajetti qural-jabdyq, ózge de kerek-jaraqpen qamtamasyz etedi;

- probatsııa qyzmetine atqarylǵan ýaqyt esebiniń tabelin, istelgen jumys aktisin jáne sottalǵan adamnyń tártibi týraly aqparat joldaıdy;

- sottalǵan adamnyń qoǵamdyq jumysty isteýden jaltarý faktisi týraly probatsııa qyzmetin habardar etedi.

Aıta keterligi, sotqa deıingi probatsııa kúdiktiler men aıyptalýshylarǵa qatysty erikti negizde qoldanylady. Oǵan kimder jatady:

- kámeletke tolmaǵandar;

- múgedektigi bar azamattar;

áıelder:

– 58 jas jáne odan asqandar;

– júktiler;

– úsh jasqa deıingi bala tárbıelep otyrǵandar;

erler:

– 63 jas jáne odan asqan;

– úsh jasqa deıingi balany jalǵyz tárbıelep otyrǵandar.

Qujat 2025 jylǵy 14 qazannan bastap kúshine enedi. 

Eske sala keteıik, byltyr elimizde qoǵamdyq jumystan jaltarǵandarǵa qatysty zań talaby kúsheıtildi.