Sottalǵandardy berý kelisimi: bes jylda 160 azamat elge qaıtaryldy
ASTANA. KAZINFORM — Búgin Senattyń jalpy otyrysynda «Qazaqstan Respýblıkasy men Marokko Koroldigi arasyndaǵy sottalǵan adamdardy berý týraly kelisimdi ratıfıkatsııalaý týraly» Zańy maquldandy.
- Zańnyń negizgi maqsaty - sottalǵan adamdardy ońaltýǵa jáne áleýmettik qaıta beıimdeýge yqpal etý baǵytynda jazany óziniń azamattyǵy bar elinde odan ári óteýi úshin quqyqtyq negiz qurý. Shetelde júrgen azamattardy qorǵaý jáne qamqorlyq jasaýǵa kepildik berý Ata Zańymyzda naqty belgilengen. Osy basym baǵytty júzege asyrý maqsatynda, 2024 jylǵy jeltoqsan aıynda atalǵan Kelisimge qol qoıylǵan bolatyn. Elimiz qazirgi tańda 25 memleketpen osyndaı halyqaralyq sharttar jasaǵan jáne sol sharttardyń negizinde sońǵy bes jyl ishinde 160 Qazaqstan azamaty elge qaıtarylǵan, - dedi senator Nurlan Beknazarov.
Kelisim aıasynda taraptar adamdardy jazasyn óz elinde odan ári óteý úshin berýge mindetteledi jáne quzyretti organdardyń ózara is-áreketiniń tártibi rettelip, memleketter arasyndaǵy quqyqtyq yntymaqtastyq nyǵaıatyn bolady. Sonymen qatar qujatta sottalǵandardy berý jáne berýden bas tartý negizderi de aıqyndalǵan.
Qujatqa sáıkes mynadaı negizgi sharttar saqtalǵan kezde jazasyn ótep jatqan adam berilýge jatady:
- ol Úkimdi oryndaýshy memlekettiń azamaty bolǵanda;
- jaza taǵaıyndaýǵa sebep bolǵan is-áreket eki jaqtyń da ulttyq zańnamasyna sáıkes qylmys bolyp saralansa jáne olar boıynsha taraptar kelisimge kelgen jaǵdaıda.
Munymen qosa, búgin Senattyń jalpy otyrysynda «Qazaqstan Respýblıkasy men Marokko Koroldigi arasyndaǵy qylmystyq ister boıynsha ózara quqyqtyq kómek týraly kelisimdi ratıfıkatsııalaý týraly» Zańy maquldandy.
Kelisimge 2024 jylǵy 12 jeltoqsanda Qazaqstannyń Bas Prokýrorynyń jumys sapary barysynda Rabat qalasynda qol qoıyldy. Zańnyń negizgi maqsaty – Qazaqstan Respýblıkasynyń Marokko Koroldigimen qylmystyq ister boıynsha ózara quqyqtyq kómek arqyly qylmysqa qarsy kúreste tıimdi yntymaqtastyǵy úshin berik quqyqtyq negiz qurý.
- Birinshiden, kúdiktiler men aıyptalýshylardyń kinásin dáleldeýge qajetti birlesken protsessýaldyq áreketterdi júrgizýdiń quqyqtyq tetikteri jasalady. Oǵan tintý júrgizý, qylmystyq jolmen alynǵan kiristerdi tárkileý, bank shottaryn ashý, sot-medıtsınalyq saraptamalar júrgizý, tergeý áreketterine qatysý úshin qamaýdaǵy adamdardy ýaqytsha jiberý sııaqty sharalar jatady. Ekinshiden, Kelisim ózara yntymaqtastyq mindettemesin belgileıdi. Quqyqtyq kómek tıisti áreket eki elde de qylmystyq quqyq buzýshylyq dep tanylǵan jaǵdaıda ǵana kórsetiledi. Bul sharalardy ár Taraptyń quzyretti organdary júzege asyratyn bolady, - dedi senator Naýryzbaı Baıqadamov.
Buǵan deıin osyndaı kelisimder jasalǵan 30-dan astam memleketpen jasalǵan. Olardyń ishinde Qytaı, Ulybrıtanııa, Úndistan, Frantsııa, AQSh jáne basqa da elder bar.
Esteńizge sala keteıik, senatorlar «Qazaqstan Respýblıkasy men Marokko Koroldigi arasyndaǵy ustap berý týraly kelisimdi ratıfıkatsııalaý týraly» Zańyn maquldady.