Sottalǵandar nege qaıtalap qylmys jasaıdy – Komıtet jaýaby
ASTANA. KAZINFORM – Іshki ister mınıstrligi Qylmystyq atqarý júıesi komıtetiniń mamandary sottalǵandar arasynda qylmys áleminiń sýbmádenıetine boı usynǵandardyń máselesi ózekti ekenin rastap otyr.
«Mundaı jaǵdaıda olar usynylǵan kómekti qabyldaýdy bylaı qoıyp, qylmystyq atqarý júıesiniń qyzmetine belsendi túrde kedergi keltirip baǵady. Úkim men jaza ol adamdardy ózgerte almaıdy. Kesilgen merzimdi ótep shyqqan soń qaıtalap qylmysqa urynady», - delingen Kazinform saýalyna joldanǵan jaýapta.
Qylmystyq atqarý júıesiniń mamandary sottalǵandardyń rejımge boıusynýdan góri qylmystyq sýbmádenıetke beıim bolýyna birneshe faktor áser etetinin aıtady.
«Ádette, ondaı adamdar 1-2 ret emes, birneshe ret sottalǵan bolyp shyǵady. Olardy zańdy saqtaıtyn ómir jolyna salý is júzinde múmkin emes. Jatatyn orny bar, qajet degen dúnıeniń bárin abaqty qamtamasyz etedi. Osynyń bárin eskersek, sottalǵan adam jaza merzimi bitkennen keıin aılap qana bostandyqta júrip, qaıta oralady. Osylaısha ómiriniń kóbi túrmede ótedi. Munyń bári sottalǵan adamnyń ómirge masyldyq túsinikpen qaraýyn týdyrady», - delingen komıtet jaýabynda.
