Sottalǵandar fast-fýdqa tapsyrys bere alady
NUR-SULTAN. QazAqparat - Sottalǵandar fast-fýdqa tapsyrys bere alady. Bul týraly QR Іshki ister mınıstrligi Qylmystyq atqarý júıesi komıtetinen málim etti, dep habarlaıdy QazAqparat tilshisi.
«Penıtentsıarlyq júıeni jańǵyrtý jáne reformalaý - Memleket basshysy men Іshki ister mınıstriniń Qylmystyq-atqarý júıesi komıtetiniń aldyna qoıǵan basty mindeti. Sottalǵandarǵa arnalǵan elektrondyq dúkender servısin engizý, olardy jumysqa ornalastyrý osy protsestiń mańyzdy baǵyttary bolyp tabylady. 2019 jyldan bastap sottalǵandar úshin azyq-túlik ónimderi men birinshi kezekte qajetti taýarlardy jetkizý jónindegi mamandandyrylǵan elektrondyq dúkender qoljetimdi. Munda taýarlardyń 400-den astam ataýy usynylǵan, olardyń barlyǵy tergeý ızolıatorlary men túzeý kolonııalarynda satý úshin qaýipsiz sanatqa jatady», - delingen taratylǵan aqparatta.
Vedmostvo málimetinshe, taýarlar tizimi únemi tolyqtyrylyp, keńeıtilip otyrady. Olardyń qatarynda azyq-túlik, sýsyndar, turmystyq hımııa, keńse taýarlary, kıim-keshek bar. Sottalǵandar meıramhanalardan ystyq taǵamǵa da tapsyrys bere alady: fast-fýd, dástúrli jáne shyǵys taǵamdary, sýshı jáne pıtstsa. Barlyq baǵalar qol jetimdi. Sottalǵandardyń týystary kolonııaǵa eń qajet zattardy jetkizý úshin elektrondy dúkendi qoldana alady, bul ásirese pandemııa jaǵdaıynda óte ózekti, al baılanyssyz jetkizý vırýstyń túzeý mekemesi ishinde taralýyna jol bermeıdi.
«2019 jyly biz QAJ mekemelerinde elektrondyq dúkenderdi engizý boıynsha pılottyq jobany iske qostyq. Joba Aqmola jáne Almaty oblystarynda jáne Almaty qalasynda júzege asyrylýda. Bolashaqta biz bul tájirıbeni elimizdiń barlyq kolonııalary boıynsha engizýdi josparlap otyrmyz. Bul bizdiń júıemizdi reformalaýdyń asa mańyzdy baǵyty jáne sottalǵandardyń áleýmettik beıimdelýi úshin asa mańyzdy mánge ıe. Olar kolonııada turyp, ózderin qoǵamnyń bir bólshegi retinde sezine alady», - dep atap ótti QAJK tóraǵasy Janat Eshmaǵambetov.
Sonymen qatar, taǵy 4 mekemede jasalǵan memorandým aıasynda azyq-túlik ónimderi men sálemdemelerdi jetkizý jobasy iske qosyldy. Munda týystary saıtta qajetti taýarlardy satyp alyp, mekemege jetkizýge tapsyrys bere alady (kýrerlik qyzmet arqyly).
Búgingi tańda Almaty qalasy, Almaty jáne Aqmola oblystarynyń QAJD mekemelerinde tórt kásipkerlik sýbekti («CONVEX CO» JShS, «VNIMANIE-Telecom» JShS, «Plehov SIZORDER» JK, «Servıs prodýkt» JShS) arnaıy kontıngentke arnalǵan azyq-túlik ónimderi men saýqattardy jetkizý boıynsha elektrondyq qyzmetterdi usynady. QAJK basshysynyń aıtýynsha, bul jumys penıtentsıarlyq júıede tsıfrlandyrýdy damytýǵa baǵyttalǵan, bul ony jetildirýde oń áser etedi.
