Sottalǵandar endi túrmedegi taǵdyryn ózderi sheshetin bolady - ІІM
ASTANA. QazAqparat - Jańa Qylmystyq-atqarý kodeksiniń jobasyna sáıkes, sottalǵandar túrmedegi taǵdyryn ózderi sheshetin bolady. Búgin Parlament Májilisiniń jalpy otyrysynda Qylmystyq-atqarý kodeksi jobasy boıynsha baıandama jasaǵan Іshki ister mınıstri Qalmuhanbet Qasymov osylaı málim etti.
Mınıstrdiń sózine qaraǵanda, kodeks jobasy sottalǵandardyń quqyqtary men zańdy múddeleriniń qorǵalý deńgeıin, qylmystyq jazalardy oryndaýdyń tıimdiligin edáýir arttyrýdy, sondaı-aq sottalǵandarǵa tárbıelik turǵydan yqpal etýdiń sapasy men dárejesin jaqsartýdy kózdeıdi. «Qujatta eń aldymen bas bostandyǵynan aıyrý jazasyn oryndaý tetigi jetildiriledi. Jazany oryndaýdyń buryn engizilgen progressıvtik júıesi endi qonys-kolonııalar men túrmelerge taralatyn bolady. Bul júıe sottalǵandardy ustaýdy kezeń-kezeńimen aýystyrýdy jáne olardy quqyqqa moıynsunǵyshtyqqa, tártipke baǵynǵan júris-turysqa yntalandyrady», - deıdi Qalmuhanbet Qasymov. Mınıstrdiń aıtýynsha, kodekske sáıkes, bas bostandyǵynan aıyrylǵandar aldymen óz jazalaryn ádettegi jaǵdaıda óteı bastaıdy. Alaıda, keıinnen júris-turysyna, túrmedegi is-áreketterine qaraı olardy qatal nemese jeńildetilgen jaǵdaıda ustaýmen aýystyrý qarastyrylady. «Osyǵan oraı, kodekste sottalǵandardy júris-turysyna, tártibine qaraı jikteý kózdeledi. Máselen, jazasyn ótep jatqan bas bostandyǵynan aıyrylǵandar úsh topqa bólinedi. Atap aıtqanda, sottalǵandar tártipti birli-jarym buzatyndar, ekinshi top - tártipti júıeli túrde buzatyndar jáne úshinshi top - qasaqana tártip buzýshylar. Bul jikteý tárbıelik úderisti barynsha saralanǵan qadammen júzege asyrýdy qamtamasyz etetin bolady. Tipti, eń aqyrynda sottalǵandardyń ózi túrmedegi taǵdyryn ózderi sheshetin bolady», - deıdi Q. Qasymov.
