Sottalǵan azamat jemqorlyq arqyly tapqan 12 mln teńgesin memleket qazynasyna quıatyn boldy
ASTANA. KAZINFORM – Bas prokýratýranyń narazylyǵy boıynsha Qylmystyq ister jónindegi kassatsııalyq sot zańsyz alynǵan 12 mln teńgeni memleket kirisine óndirý týraly sheshim qabyldady.
Vedomstvonyń málimetinshe, qylmystyq is boıynsha «M» esimdi azamattyń jekelegen adamdarǵa qamqorlyq kórsetkeni úshin birneshe ret zańsyz syıaqy alǵany anyqtalǵan. Alynǵan qarajattyń jalpy kólemi 12 mln teńgeni quraǵan.
Sot úkimimen atalǵan azamat bas bostandyǵynan aıyrý jazasyna kesilgen. Alaıda sot zańsyz alynǵan aqshany memleket kirisine óndirý máselesin sheshpegen.
Osyǵan baılanysty Bas prokýratýra sot aktisine narazylyq engizgen.
– Qylmystyq ister jónindegi kassatsııalyq sot múlikti tárkileý máselesiniń durys sheshilmeýine baılanysty engizilgen Bas prokýratýranyń narazylyǵyn qanaǵattandyrdy. Prokýratýranyń narazylyǵy boıynsha kassatsııalyq sot bul máseleni qaıta qaraýǵa jatady dep tanyp, «M»-nen memleket kirisine 12 mln teńge óndirdi, – delingen vedomstvo habarlamasynda.
Bas prokýratýranyń málimetinshe, bıyl sybaılas jemqorlyq qylmystary boıynsha engizilgen jeti narazylyq qanaǵattandyrylǵan.
Nátıjesinde sybaılas jemqorlyq qylmystary arqyly zańsyz alynǵan jalpy somasy 50 mln teńgeni memleket kirisine óndirý qamtamasyz etildi.
Aıta keteıik, buǵan deıin prokýrordyń kassatsııalyq narazylyǵy boıynsha onlaın-kazıno uıymdastyrǵan azamattan zańsyz alynǵan 9,9 mln teńge memleket kirisine óndirilgen bolatyn.
