Sottalǵan jáne úı qamaýyndaǵylar elekrondy bilezik arqyly baqylanady – ІІM

NUR-SULTAN. QazAqparat – Elimizde isti bolǵan jáne úı qamaýyna alynǵan aıypty jandar arnaıy elektrondy bilezik arqyly baqylaýda bolady. Bul týraly QR Іshki ister mınıstriniń orynbasary Sáken Sársenov málim etti, dep habarlaıdy QazAqparat tilshisi.

«Bul bilezik sottalyp shartty túrde merziminen buryn bosatylǵan jáne úı qamaýyndaǵy aıypty azamattarǵa taǵylady. Buǵan deıin joǵaryda atalǵan aıyptylardy jeke-jeke mamandar qadaǵalady, olarǵa arnaıy kólik bólindi. Endigi ýaqytta 300-400 sottalýshy nemese úı qamaýyndaǵy aıyptyny 1 ǵana tártip saqshysy baqylaı alady. Bilezik qoldan sheshilmeıdi, sheshken jaǵdaıda birden dabyl soǵylady», - dedi S. Sársenov atalǵan elektrondy bilezikti tanystyrý barysynda.

Onyń aıtýynsha, elektrondy bilezik arqyly kez kelgen adamnyń qaıda ne istep júrgenin baqylaýǵa bolady.

Buǵan deıin elimizde balalardyń qaýipsizdigin qamtamasyz etýge arnalǵan jańa elektrondy qurylǵynyń tanystyrylǵany týraly habarlaǵan bolatynbyz.