Sottaǵy «kelin» sózi Nuraıdyń ata-anasyn kúızeltti: Sherhan Aımahannyń týystary ne aıtty
ShYMKENT. KAZINFORM — Shymkent qalasynyń qylmystyq ister jónindegi mamandandyrylǵan aýdanaralyq sotynda Nuraı Serikbaı isi boıynsha sottalýshy Sherhan Aımahannyń alty týysy kýáger retinde sóz sóıledi.
Olardyń barlyǵy Nuraıdyń Sherhan Aımahannyń úıine óz erkimen barǵanyn, turmysqa shyǵýǵa qarsy bolmaǵanyn jáne úıdegilermen erkin sóıleskenin aıtty. Kýágerlerdiń bul jaýaptary qaza bolǵan qyzdyń ata-anasyna aýyr tıdi.
Sot otyrysy barysynda sottalýshynyń ákesi Álmahan Mákenov, anasy Aıgúl Mákenova, aǵasy Darhan Mákenov, kámeletke tolmaǵan inisi Nurhan Aımahan, ápkesi Láıla Mákenova jáne ákesiniń qaryndasy Fatıma Mákenova jaýap berdi.
Qorǵaý tarapynyń kýágerleri oqıǵa barysyn birdeı sıpattady. Olardyń aıtýynsha, Nuraı týystarymen erkin sóılesken, kúlimsirep otyrǵan, úıden ketýge áreket jasamaǵan, turmysqa shyǵýǵa kelisim bergeni týraly qolhat jazǵan, oramal taǵýǵa kelisken. Keıin qudalar keler aldynda jýynyp, kıim aýystyryp, daıyndalý úshin aýylǵa aparýdy suraǵan.
Beınebaılanys arqyly jaýap bergen Láıla Mákenova Nuraıdy aýylǵa birge aparǵanyn, onda qyz kıim aýystyrǵanyn, keıin Sherhanmen birge dúkenge barǵanyn aıtty.
— Eshqandaı qysym baıqamadym. Ol erkin sóılesti. Tek «Meniń ata-anam buǵan kelispeıdi» dep aıtty, — dedi kýáger.
Sot barysynda tóraǵalyq etýshi sýdıa oqıǵanyń mán-jaıyna qatysty suraqtar qoıyp, kýágerlerden aıtylǵan derekterdi túsindirýdi surady. Atap aıtqanda, Nuraıdan kelisim qashan alynǵany, oǵan oramaldyń qaı kezde taǵylǵany jáne qolhat qandaı jaǵdaıda jazylǵany naqtylandy.
Sot otyrysynda sottalýshynyń ákesiniń qaryndasy Fatıma Mákenovanyń jaýaby erekshe nazarǵa ilikti. Ol Nuraıdy «kelin» dep atap, jastar arasynda mahabbat bolǵanyn jáne qyzdyń Sherhanǵa turmysqa shyǵýǵa nıeti bolǵanyn málimdedi.
Bul sózder qaza bolǵan qyzdyń jaqyndarynyń janyna batty. Sot aıaqtalǵannan keıin Nuraıdyń anasy emotsııasyn ustaı almaı, jylap jiberdi. Ol sottalýshynyń týystaryna qarap, osy ýaqytqa deıin qyzynyń qazasyna baılanysty nege eshkim keshirim suramaǵanyn aıtty.
Jábirlenýshi taraptyń advokaty Aıanhan Omarovtyń sózinshe, sottalýshy týystarynyń ókinish bildirmeýi Nuraıdyń otbasyna qatty áser etken.
— Meni tańǵaldyrǵany ári qynjyltqany — týystarynyń eshqaısysy tipti ókinish bildirmegeni. Kerisinshe, barlyǵy Nuraıdyń turmysqa shyǵýǵa óz erkimen keliskenin jáne sottalýshynyń úıine ózi barǵanyn dáleldeýge tyrysty. Bizdiń oıymyzsha, bul shyndyqqa sáıkes kelmeıdi, — dedi advokat jýrnalısterge.
Onyń aıtýynsha, Nuraıdyń ata-anasy Fatıma Mákenovanyń qyzdy «kelin» dep ataǵanyn aýyr qabyldaǵan.
— Dástúrimiz boıynsha qyzdy «kelin» dep tek «betashar» rásiminen keıin ataýǵa bolady. Ondaı rásim bolǵan joq. Sondyqtan bul sóz Nuraıdyń ata-anasyna qatty áser etti, — dedi Aıanhan Omarov.
Advokat sondaı-aq qaza bolǵan qyzdyń týystary sottan keıin sottalýshynyń kámeletke tolmaǵan inisi Nuraıdyń anasyna qarap kúlgenin aıtqanyn jetkizdi. Onyń sózinshe, bul jaǵdaı anasynyń qaıǵysyn odan ári údetken.
Túski úzilisten keıin sot qylmystyq is boıynsha jazbasha materıaldardy zertteýdi jalǵastyrady. Memlekettik aıyptaýshy tergeý materıaldary men aıyptaýǵa negiz bolǵan saraptama qorytyndylaryn jarııalaýǵa kirisedi.
Eske salaıyq, tergeý nusqasy boıynsha, 2025 jyldyń qazanynda Sherhan Aımahan Nuraı Serikbaıdy «alyp qashý» rásimi arqyly nekege májbúrleý maqsatynda alyp ketken.
Aıyptaý tarapynyń málimetinshe, qyzdy ata-anasy úıine alyp ketkennen keıin de sottalýshy ony ańdýyn jalǵastyrǵan. Tergeý deregine sáıkes, 2026 jylǵy 11 qańtarda ol Nuraıdy úıiniń mańynda kútip, oǵan 35 ret pyshaq jaraqatyn salǵan.
Sottalýshyǵa adam óltirý, nekege turýǵa májbúrleý jáne ańdý (stalkıng) baptary boıynsha aıyp taǵylǵan.
