Sotta janjalǵa sebep bolǵan aıyptalýshydan jaýap alyndy

TALDYQORǴAN. KAZINFORM – Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr. 

Sotta aıyptalýshy Darhan Áskentaıdan jaýap alyndy. Advokattyń suraǵyna jaýap bergen ol alǵashqy tergeý kezindegi jaýaptarymen kelispeıtinin aıtty. Onyń aıtýynsha, sol kezde oǵan qysym kórsetilgen jáne durys jaýap bere almaǵan.

Ári qaraı aıyptalýshy «Qamajaı» dúkenine qashan jáne ne maqsatta barǵanyn túsindirdi.

— Sol kúni saǵat 23:00 shamasynda dosymnyń kóliginen túsip, «Qamajaı» dúkenine kirdim. Onda 3 syra aldym, sol jerde Qarjaýbaımen tanystym. Myń teńge Kaspi-men, myń teńge qolma-qol aqsha berdim. 500 teńgeni ózime qaıtardy. Dúkenge ekinshi ret kelip, telefondy qýattaǵyshqa qoıýdy ótindim, — dedi aıyptalýshy.

Darhan Áskentaıdan osy kezde Sherzatpen ózara qandaı kıkiljiń bolǵanyn da túsindirip ótti. Sonymen qatar oqıǵa ornyna telefonmen habarlasyp kimdi shaqyrǵanyn aıtty.

— Men sol kúni telefondy berip ótingennen keıin dalaǵa shyǵyp, syrany endi isheıin dep turǵanmyn. Sol sátte telefonymnyń mýzykasy oınady, sony alýǵa dúkenge kirip bara jatqan kezde Qarjaýbaı telefondy Sherzatqa berdi. Maǵan Sherzat telefondy berdi, men alyp sóılestim. Sosyn telefon qarap turǵan kezde Sherzat «sen ákeme birdeńe dediń ba, ne degiń kelip tur» dep ashýlandy. Men oǵan «júr ákeńnen suraıyq, men oǵan eshteńe demedim» dep túsindirip jattym. Qarasam qolynda kastet tur eken, aldy da oń kózimnen uryp jiberdi. Sol jerde betimdi ustap turyp qaldym. Sol sátte Qarjaýbaı shyqty, sý alyp, betimdi jýdy. Sol kezde Qarjaýbaı Sherzatqa «ne úshin urasyń» dep aıqaılap jatty. Eki bótelke syramdy aldym da, kózim kórmeı, jaǵdaıym nasharlaǵannan keıin Nurbol dosyma habarlastym. «Meni bireýler uryp ketti, alyp kete alasyń ba» dep ótindim. Ol keletinin aıtty, — dedi ol.

Darhan Áskentaı Sherzattyń anasyna balaǵat sóz aıtqanyn joqqa shyǵardy.

— Men Sherzattyń anasyna balaǵat sóz aıtpadym. Oǵan anasynan boqtaıtyndaı men 2018 jyly anamnan kóz aldymda aıyrylǵanmyn. Bir jaǵy jaǵdaıym da, densaýlyǵymda joq, — dedi ol.

Sondaı-aq sottalýshynyń aıtýynsha, marqum Sherzattyń ákesi Qarjaýbaı Nurymov oǵan eshqandaı kómek usynbaǵan.

— Qarjaýbaı «aqshańdy berem, eshkimdi shaqyrma, urma, soqpa» degen áńgime bolǵan joq. Dosym (N.Toqtaýbaev) kelgennen bastap «aǵa, aǵa» degennen basqa eshteńe degen joq. «Nege jedel járdem shaqyrmaısyzdar, men alyp ketýge kelip turmyn» dedi. Bul jerde aqsha týraly áńgime bolǵan joq, — dedi sottalýshy.

Buryn sotta Sherzattyń aǵasy Nurqanat Ǵaıypbaevtyń tergeý kezindegi beınejazbasy kórsetildi.

Sonymen qatar oqıǵa ornyna alǵash barǵan polıtseıler jaýap berdi.

Oǵan deıin sot otyrysynda kýáger Elmıra Nurbekova jaýap berdi.

Ekinshi kýáger qyz Dana Jaqsygeldi oqıǵa týraly baıandady.

Sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi.

Eske salaıyq, prokýror oqıǵanyń tolyq hronologııasyn baıandady. 

Aıyptalýshylardyń kópshiligi kináni moıyndaǵan joq.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

2024 jyldyń jeltoqsan aıynda Talǵar mańynda Sherzat Polattyń aǵasynyń denesi tabyldy.