Sotta Talǵardyń Krımınaldyq polıtsııa bóliminiń bastyǵy jaýap berdi
TALDYQORǴAN. KAZINFORM – Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.
Sotta Talǵar aýdandyq polıtsııa basqarmasynda Krımınaldyq polıtsııa bóliminiń bastyǵy mindetin atqarýshy Medet Ádiljan jaýap berdi. Ol byltyr 4 qazan kúni tergeý qalaı júrgenin baıandady.
— Jedel kezekshiden bolǵan oqıǵa boıynsha habarlama tústi. Sol boıynsha aýdandyq polıtsııa basqarmasyna bardym. Qaramaǵymdaǵy qyzmetkerlerdi oqıǵa boıynsha kóterdim, is boıynsha ár qyzmetkerge tapsyrma berdim. Ol jaqtan oqıǵa ornyna bardym. Іstiń mán-jaıyn bilip, belgilengen jumys boıynsha jumys istedik, — dedi ol.
Sonymen qatar Medet Ádiljan 4 qazan kúni emhanada jábirlenýshi jatqanyn bilip, oǵan barǵanyn atap ótti. Emhanada ol Nurqanat Ǵaıypbaevtan jaýap alyp, ony kameraǵa túsirgen. Onyń aıtýynsha, sol kezde jábirlenýshi Sherzatqa pyshaq suqqan azamat retinde Abzal Shynasyldyń, al ózine pyshaq siltedi dep Azamat Toqtaýbaevtyń sýretin kórsetken.
Prokýror polıtsııa ókilinen N.Ǵaıypbaevty beınejazbaǵa túsirýi qanshalyqty zańdy bolǵanyn jáne qandaı qaýly ne bapqa negizdele otyryp istelgenin surady. Bul suraqty birneshe ret advokattar men sýdıa da naqtylap ótti.
— Beınejazbaǵa tergeýshi tarapynan eshqandaı qaýly bolǵan joq. Óz basym qylmysty, kýáger men kúdiktilerdi anyqtaý maqsatynda túsirdim, — dedi Krımınaldyq polıtsııa bóliminiń bastyǵy.
Buryn sotta Sherzattyń aǵasy Nurqanat Ǵaıypbaevtyń tergeý kezindegi beınejazbasy kórsetildi.
Sonymen qatar oqıǵa ornyna alǵash barǵan polıtseıler kýálik berdi.
Oǵan deıin sot otyrysynda kýáger Elmıra Nurbekova jaýap berdi.
Ekinshi kýáger qyz Dana Jaqsygeldi oqıǵa týraly baıandady.
Sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi.
Eske salaıyq, prokýror oqıǵanyń tolyq hronologııasyn baıandady.
Aıyptalýshylardyń kópshiligi kináni moıyndaǵan joq.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy.