Sotta Sherzattyń aǵasy Nurqanat Ǵaıypbaevtyń tergeý kezindegi beınejazbasy kórsetildi

TALDYQORǴAN. KAZINFORM – Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.

Sotta memlekettik aıyptaýshy Sherzattyń aǵasy marqum Nurqanat Ǵaıypbaevtyń tergeý kezindegi jaýabyn oqydy. Keıin otyrys barysynda tergeý beınejazbasy jarııalandy. Onda Nurqanat Ǵaıypbaev «Qamajaı» dúkeni mańynda oqıǵa qalaı bolǵanyn túsindiredi.

- Saǵat 23:30 kezinde aǵam habarlasty. Jeńgem oıatty. Telefon arqyly «dúkenge kelshi» dedi. Dúkenge Ravon avtokóligimen bardym. Kelgen kezde bir balanyń murny qanap tur eken. Sóılestim. Ol balalardy shaqyra bastady. Sol kezde eki bala Golf avtokóligimen keldi. Kólikten túsken jigit ózin «Nurbol hýtorskıı, 95-pin» dep tanystyrdy. Men esimim Nurqanat dep aıttym. Mán-jaıdy aıtyp, túsindirdim. Ol «ózim tóleı salamyn» dedi da, tólep joǵary ketip qaldy. Men bári bitti dep oıladym. Dúkenge baýyrymdy (Sherzat) alyp kirdim. Sosyn mán-jaıdy tolyq bileıin dep aǵammen sóılesip jatqan kezde olar qaıtyp keldi. Sosyn janjal qaıta ýshyǵa tústi. Olar eregisedi, balalardy shaqyrady. Baýyryma «qaıt úıge» dep qaıtaryp jibergemin. Hyndai osy tusqa toqtaıdy, artynan Mercedes avtokóligi kelip turady, – deıdi ol beınejazba.

Sonymen qatar N. Ǵaıypbaev beınejazbada tergeýshiniń birneshe suraǵyna jaýap berip, oqıǵany ári qaraı baıandady.

- Ekinshi ret janjal bastalǵan kezde Sherzatqa «sen úıge qaıt, ózim birdeńe qylyp sheshemin» dep aıtamyn. Ravon avtokóligin aıdaıdy da, úıge qaraı ketedi. Sherzat qalaı ketti, mynalar kelip toqtaıdy. Men sóılesip turamyn. Myna jaǵymda Nurbol, myna jaǵymda Ravıl boldy. «Baýyrym, aqsha deseń aqsha, emdep berem» dep, qol berdik. Osynda turǵan kezimde Ravıl Hyndai kóligindegi jigittermen jaqyndaıdy. Myna jerde (dúken buryshy) Ahmet turady. Ony Abzal kelip urady, ol qulap, talyp qalady. Men júgirip kelip, turǵyzamyn da, «qashyńdar ári qaraı» deımin. Jalǵyz qalam osy jerde. «Kishkentaı bala ǵoı, ne boldy jigitter» dep jattym. Bir jaǵy ishte (dúken) ne bolyp jatyr dep qarap turdym. Onda baýyrym Qarjaýbaı bar. Shyqsa, birge qashyp ketemiz degen oı boldy. Bir kezde tóbeles bolady. Nurqııasty uramyn, ol otyryp qalady da, ózime qaraı qaıta umtylady. Abzal urady. Men artqa sheginemin, sol kezde Sherzat keledi. Ol ustap artqa tartady. «Sherzat qash» dep aıtamyn. Ol bylaı qaraı qashady. Myna jerde Nurqııas, Azamat, Ravıl maǵan qaraı atylady. Osy jerde tas alyp birinshisin uramyn da, sol sátte Sherzat «Nurǵanat aǵa, maǵan birdeńe tyǵyp aldy» dep aıqaılaıdy. Men oǵan qaraı júgiremin. Ol otyrady, men qushaqtaımyn. Jaraqatyn izdeı bastaımyn. Aýzynan qan shyǵyp jatyr. Sonda «toqtańdar, jigitter pyshaq tyǵyp aldyńdar» dep aıqaılaı bastaımyn. Sol kezde sońyna deıin urýǵa kele jatqandaryn kóremin. Birinshi Nurqııas kele jatty, qolynda myltyq boldy. Artynan Ravıl, Azamat, Abzal, Darhan, Dıdar, Shyńǵys boldy. Men qushaqtaımyn, jeńgem júgiredi. Sherzatty urady, ony ózime qaraı tartamyn. Sosyn meni uryp tastaıdy. Men esimnen tanamyn. Osy jerde uryp, pyshaq suǵady. Adamdar vıdeoǵa túsire bastaıdy. Men súırep, ana jerge aparyp, urady, – deıdi ol beınejazbada.

Keshe sot otyrysynda kýáger Elmıra Nurbekova jaýap berdi.

Odan keıin ekinshi kýáger qyz Dana Jaqsygeldi oqıǵa týraly baıandady.

Buǵan deıin sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi.

Sherzattyń anasy Gúlbara Beıshembıeva da qaıǵyly oqıǵa qalaı bolǵanyn eske aldy.

Eske salaıyq, prokýror oqıǵanyń tolyq hronologııasyn baıandady. https://kaz.inform.kz/news/sherzat-polat-soti-prokuror-okiganin-tolik-hronologiyasin-bayandadi-b0753c/

Aıyptalýshylardyń kópshiligi kináni moıyndaǵan joq.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy.

Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.