Sotta Sherzat óliminiń negizgi sebebi ataldy
TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda 16 jastaǵy Sherzat Polattyń ólimine baılanysty basty sot otyrysy ótip jatyr.
Memlekettik aıyptaýshy sot otyrysy barysynda kámeletke tolmaǵan Sherzat Polattyń ólimi 2024 jyldyń 4 qazanynda saǵat 01:30–da Talǵar ortalyq aýdandyq aýrýhanasynyń statsıonarynda rastalǵanyn málimdedi. Sondaı-aq prokýror jasóspirimniń sol kúni bolǵan janjal barysynda qandaı jaraqat alǵanyn jáne qandaı sebepten qaıtys bolǵanyn atady.
— Kámeletke tolmaǵan Polattyń ólimi sol jaq ókpeniń joǵary bóligine zaqym keltire otyryp, sol jaqtaǵy keýde qýysyna enip, shanshylyp kesilgen jaraqat nátıjesinde aýyr qan joǵaltýdan boldy. Ólimi 2024 jyldyń 4 qazanynda saǵat 01:30–da Talǵar ortalyq aýdandyq aýrýhanasy statsıonarynda rastalǵan. Máıitti zertteý kezinde kelesi dene jaraqattary anyqtaldy: ishki jáne syrtqy qan ketýdi týdyrǵan sol jaq ókpeniń joǵary bóliginiń zaqymdanýy. Bul dene jaraqaty statsıonarǵa kelgenge deıin shanshý-kesý qasıeti bar zattyń áserinen týyndaǵan. Syrtqy dene jaraqattary: sol jaq jelke aımaǵynda bastyń shashty bóliginiń terisiniń kógerýi, oń kózdiń ishki buryshynda, oń kózdiń qabaǵynda, oń qoldyń artqy betinde, oń qoldyń ekinshi, úshinshi, tórtinshi saýsaqtary, sol jaqta muryn, erin aımaqtarynda, oń bilektiń bir bóliginde syzattar, — dedi prokýror.
Buǵan deıin Nurqanat Ǵaıypbaevtyń janjal barysynda qandaı jaraqat alǵany aıtyldy.
Eske salaıyq, Sherzat isine qatysty sottalýshylarǵa birneshe bap boıynsha aıyp taǵyldy.
Prokýror oqıǵanyń tolyq hronologııasyn baıandady.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy.
Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.